Бразилиянинг Сан-Паули метрополитенида 55 ёшли эркак метрода поезд яқинлашиб келаётганини кўргач, бекатда турган аёлни рельсга итариб юборди, деб хабар берди Tvzvezda.ru нашри.
Мазкур воқеани кузатув камераси видеога олди.
Воқеа сешанба, 9 январь куни содир бўлди. Нашрнинг хабар беришича, 23 ёшли йўловчи аёл поезднинг келишини кутиб, телефонида ёзишиб ўтирган вақтда орқасидан келган эркак уни рельсга итариб юборган. Бир неча сониялардан кейин аёл рельслар оралиғига йиқилганлиги сабабли поезд уни босмади. Метрополитен ходимлари зудлик билан электр токини ўчириб, жабрланган аёлни юқорига олишди. Шифокорлар аёлнинг чап қўли синганлигини ва жиддий бўлмаган шикаст олганлигини қайд этишди.
«Мен энди ўлсам керак, деб ўйладим. Ким итариб юборганини кейинчалик телевизордаги янгиликлардан билиб олдим”, деди жабрланган аёл.
Суруштирувлар натижасида жиноятчи 55 ёшли Себастьян Хосе да Силва эканлиги аниқланди. Полициянинг маълумот беришича, эркак руҳий хаста бўлган. Метродаги ҳодисага гувоҳ бўлган йўловчилар уни қўлга олиб, ҳуқуқ-тартибот идорасига топширишди.
