-Қизимни 2006 йил турмушга бердим. Айрим сабаблар билан ҳаёти бўлмади ва 2007 йил ажрашди. Орадан бир неча йил ўтиб, қайта узатдик. Бироқ яна адашибмиз. 2012 йил фарзандим ёруғ оламдан кўз юмди. Ундан қолган ягона ёдгорим, набирамни васийликка олгандим. Чунки отасининг ҳулқи бузуқ, маишатга берилган. Мени ташвишга солаётгани, куёв болани мендан олиб қўймоқчи. Айримлар васийлик тўғрисидаги ҳоким қарори уч йилга етади, кейин кучдан чиқади дейишаяпти. Шу ҳолатга аниқлик киритсангиз. Наҳот набирамни олиб қўйишса?
Нозир Ҳакимов, Сурхондарё вилояти
-Васийликни белгиловчи ҳужжат уни қабул қилган орган томонидан бекор қилингунига қадар амалда бўлади. Ушбу қарорда уни бекор қилиш муддати белгиланмайди. Васийликни белгиловчи ҳужжатнинг бекор қилинишига боланинг вояга етиши, ота-онасидан бирининг ота-оналик ҳуқуқини тикланиши ҳамда васийнинг вафот этиши кабилар асос бўлиши мумкин. Агар набирангизнинг отаси узоқ вақт давомида фарзанд тарбиясида иштирок этмай, унга моддий ёрдам кўрсатмай келаётган бўлса, шу билан бирга спиртли ичимликларни сурункали тарзда қабул қилса, уни оталик ҳуқуқидан маҳрум қилиш ҳақида судга мурожаат этишингиз мумкин бўлади.
Манба: «Sug'diyona» газетаси
