Деярли ҳамма уй бекалари юмушларни бажариб бўлгач «Ах, жуда чарчадим!» дея тўғри диван томон ошиқишади. Лекин «Нима иш қилдим ўзи?» деган саволга жўяли жавоб топилмайди. Чунки қилинган иш ҳар доим ҳам кўзга кўринадиган бўлавермайди-да! Шундай бўлса-да чарчоққа сабаб топилади. Қуйидаги маслаҳатлар сизга ас қотиб, шахсий луғатингиздан «Чарчадим» деган сўзни ўчириб ташларсиз эҳтимол...
1. Ўзингизни кузатинг. Шунда қайси иш сизга оғирлик қилаётганини билиб оласиз. Ва шунга қараб бажарилиши керак бўлган ишлар тақсимотини кунма-кун тузиб чиқасиз.
2. Шошқалоқлигингизни тан олинг! Нафақат уй юмушларида, балки бошқа ишларда ҳам шошганингиз-шошган. Натижада бир ишни тугатмай, кейингисини бошлайсиз. Хотиржам ўтириб, қилинган ишлар сарҳисобини қилганингизда камчиликлар чиқиб келади. Оқибатда ўша ишни бошидан бошлашга киришасиз. «Чарчадим» сўзи нега оғзингиздан тушмай қолганини билгандирсиз?
3. Кундалик бажарилиши керак бўлган ишларнинг бир хиллигидан чарчайсиз. Икки букилиб кир ювасиз, эгилиб кийимларга дазмол босасиз, тик оёқда туриб овқат пиширасиз… Оқшом эса бўғинларингиз зирқираб оғриётганини сезасиз. Ҳар бир ишни ўзингизга қулай ҳолатда бажариш мумкин-ку! Кир юваётганда белингиз оғридими, бошқа ишга ўтинг. Уни бажаргунингизча кирлар бироз ивиб турса, янада осон ювилади. Битта ўқ билан иккита қуённи нишонга оласиз!
4. Ишларини бажаришда тетикликни сақлаш учун юмушларни ўзгартириб туринг. Кетма-кетликни тузиш эса ўз қўлингизда.
5. Агар кун бўйи бир ерда ўтириб ишлаган бўлсангиз, уйда кўпроқ ҳаракатда бўлинг. Ишда тик оёқда юришга тўғри келган бўлса, уйда ўтириб бажарса бўладиган юмушлар оралиқ оёғингизга дам беринг.
6. Агар бирор ишни яхши кўриб бажарилса, у иш сифатида қабул қилинмайди. Кўпчилик эса уй ишларини қилишга вақт етишмаслигидан нолийди.
7. Чарчадингизми, уй тозалашни бироз вақт четга суринг. Ошхонага кириб, севимли салатингиз ё бирор пишириқ тайёрланг. Юзингизга ниқоб, қўл-оёғингизгаи ванна қилсангиз ҳам бўлади. Балки сочингизга бигуди қўярсиз…
8. Кайфиятингизни бошқаришни ўрганинг! «Чарчадим», «қўлимдан келмайди», «Кейинга олдирсам-чи?» каби баҳоналарга ўрин қолдирманг. «Кўзқ ўроқ, қўл ботир», деган мақол шиорингиз бўлсин. Шунда ишингиз унумдорлигига ўзингиз гувоҳ бўласиз. Қолаверса, вазнингиздаги ортиқча ёғлардан ҳам қутуласиз. Ҳар ким чарчоқдан ҳар хил усул билан фориғ бўлади. Мусиқа тинглайсизми ё ўзингиз хиргойи қиласизми, гимнастикага вақт ажаратисизми, хуллас, уй ишларида ўзингизнинг «мен»ингизни топсангиз ишингиз осон битади!
Манба: «SUG‘DIYONA» газетаси.
