“Психологик портрет” лойиҳасининг меҳмони Севара Солиева. Психолог Гўзал Рўзматова билан суҳбат давомида актрисанинг феъл-атворини яхшироқ билиб олишга ҳаракат қиламиз.
Гўзал Рўзматова: — Севара Солиева билан дўстлик мавзусида гаплашамиз.
1. Севара, сиз жуда ёқимтой қизсиз. Айтингчи, энг яқин дугонангиз ҳақида ҳам худди шундай таъриф бера оласизми?
А. У менга айтилган таърифлардан кўра кўпроғига лойиқ.
Б. У ҳеч қачон мендек бўлолмайди.
С. Айтилган таърифларнинг барчаси, дугонамга ҳам хос.
2. Ҳаётий ташвишлардан безиб, чарчаганингизда кўнгилингизни бўшатиш учун дугонангизга қўнғироқ қилсангиз, у буни қандай қабул қилади?
А. У мени тинчлантиришга ҳаракат қилиб, қийинчиликлар ўтиб кетишини айтади.
Б. Бироз ҳордиқ чиқариш учун бирор ерга таклиф қилади.
С. Ўзининг муаммоларини гапиради.
3. Дугонангиз, қанчалик сизни қўллаб-қувватлайди?
А. Жуда кам ҳолатларда.
Б. Бу масалага аҳамият бермаган эканман.
С. У мени доим қўллаб-қувватлаган.
4. Унга ҳар қандай вазиятда ишонасизми?
А. Фақат баъзи ҳолларда.
Б. Мен фақат ўзимга ишонаман.
С. Унга ўзимга ишонгандек ишонаман.
5. У учун қай даражада муҳим инсонман деб ўйлайсиз?
А. Билмайман.
Б. Менимча, унинг ҳаётида менинг ўз ўрним бор.
С. Албатта, муҳим инсонман. Ахир, дугонасиман-ку!
6. Аразлашиб қолганингизда ким биринчи қадам ташлайди?
А. Кўп ҳолларда мен гап бошлайман.
Б. Дугонам гапиришини кутиб тураман.
С. Ҳеч нарса бўлмагандек бир вақтда гаплашиб кетамиз.
7. Дугонангиз, дўстлик ришталарингиз қай даражада мустаҳкамлигини текшириш мақсадида тестдан ўтганингизни билиб қолса...
А. Тестнинг жавоби билан қизиқади.
Б. Бу шунчаки оддий тест эканлигини таъкидлайди.
С. Ўзи ҳам қизиқиб қолиб, ўзини ҳам синаб кўришни истайди.
Севара Солиева: — 1. С; 2. А; 3. С; 4.А; 5. А; 6. С; 7. Б;
Психолог хулосаси:
Гўзал Рўзматова: — Дугонангиз билан муносабатингизни омадли, деб атаса бўлади. Доим “бир ёқадан бош чиқариб”, муаммоли вазиятларни ҳал қила оласиз. Бундан ташқари, дўстлар ўртасидаги мехр-оқибат борасида ҳам сизларга кўплар ҳавас қилиши мумкин. Лекин шундай бўлса ҳам сизда унга нисбатан бироз ишончсизлик бор. Ҳамма сирингизни ишонмайсиз. Бу эса ўзингиз билан боғлиқ муаммо. Яъни қачонлардир атрофингиздагиларишончингизни суистеъмол қилишганидан, ҳаммани ана шу “қарич”да ўлчайсиз. Лекин ёдингизда тутинг, ҳамма бир хил эмас. Сизга ишонч билдирганларга сиз ҳам самимий муносабатда бўлишингизни маслаҳат бераман.
“ОЛМА”ЛИ ТЕСТ
Гўзал Рўзматова: — Севара, энди мана бу суратлардаги олмалардан бирини танланг. Замонавий психологик усулда сиз билан яна-да яқинроқ танишамиз.Ушбу тестдан мухлислар ҳам фойдаланиб, қандай дўст эканликларини билиб олишлари мумкин.
Севара Солиев: — Учинчи рақамдаги олма.
ТЕСТ ЖАВОБЛАРИ
1. Самимий ва ўйлаганларини тўғридан-тўғри айтадиган инсонсиз. Бу ширин ёлғондан кўра, аччиқ ҳақиқатни афзал кўришингиздан далолат. Касбингиздаги ютуқ ёки бирор бир муаммоларга дуч келганингизда ўзингизни йўқотиб қўймаслигингизга эса ҳавас қилса арзийди.
2. Куч-қувватга бой хушчақчақ инсонсиз! Деярли ҳар бир кунингиз қизиқарли саргузаштларга бой тарзда ўтади. Ҳар бир дақиқадан завқланиб яшашни сиздан ўрганиш керак.
3. Яхши суҳбатдошсиз, давраларнинг тўри ҳамиша сизники. Сиз билан дўстларингиз зерикиш нималигини билишмайди. Шунинг учун ҳам дўстларингиз ёнингизга шошишади, десак хато бўлмайди. Ўзингиздаги ушбу фазилатни йўқотманг. Оптимизм — баъзи ҳаётий муаммоларни енгишга яхши ёрдам беради.
4. Дўстларингиз ҳар қандай вазиятда сизга суянишади. Вазиятдан тўғри хулоса чиқара олишингиз ва кераклиги маслаҳатларингиз билан улар ишончини қозонгансиз. Одамларни эшита олганингиз учун ҳам улар кўп мурожаат этишади.Кам гапириб, кўп ўйлайдиган одамлар тоифасиданлигингизни алоҳида таъкидлаб ўтиш керак.
Алия СУЛАЙМАНОВА
