Интерпол Европада террорчилик актларини содир қилиш учун ўқитиб, тайёрланган 173 нафар террорчининг рўйхатини маълум қилди, деб хабар берди Russian.rt.com нашри.
Мазкур рўйхат “Ислом давлати” террорчилик гуруҳига қарши Сурия ва Ироқда ўтказилган ҳарбий операциялар вақтида олинган АҚШ разведкаси томонидан Интерполга берилган маълумотлар асосида тузилди.
Рўйхатда одамларни ўлдириш ва тан жароҳати етказиш учун ўзлари қўлбола портлаш воситаларини ясайдиган, ўрната оладиган террорчилар ўрин олган. Уларнинг Европа мамлакатларида террорчилик актларини ўтказишни режалаштиришаётгани тахмин қилинмоқда. Гумонланувчиларнинг айни пайтда Европага етиб келган-келмаганлиги номаълум.
Ҳужжатда уларнинг исми-шарифи, террорчилик гуруҳига аъзо бўлган санаси, сўнгги яшаш жойи, улар қатнайдиган мачит манзили, ота-онасининг исми-шарифи ва фотосуратлари илова қилинган.
