Ўзбекистон миллий терма жамоасининг ЖЧ–2018 турнирига саралаш босқичи “А” гуруҳидаги рақиби – Эрон терма жамоаси кеча, 4 июнь куни Черногорияга қарши ўртоқлик учрашувини ўтказди.
Подгорица шаҳрида бўлиб ўтган ўйинда эронликлар 2:1 ҳисобида зафар қучди. Ўйиннинг 10-дақиқасида Сардор Азмун ҳисобни очган бўлса, 32-дақиқада Стефан Йоветич мувозанатни тиклади. 60-дақиқада яна Сардор Азмун ўз номини таблога ёздирди ва Эрон термаси ғалабани расмийлартирди.
Қайд этиш жоиз, учрашувнинг 79-дақиқасидан бошлаб эронликлар 1 киши кам бўлиб ҳаракат қилди, аммо бу ўйин натижасига таъсир қилмади.
Ўзбекистон терма жамоаси Эронга қарши ўйиндан аввал Тошкентда Таиланд термаси билан тўқнаш келади. Ушбу ўйин 6 июнь куни “Бунёдкор” стадионида, соат 20:00 да бошланиши кўзда тутилган.
Эслатиб ўтамиз, “А” гуруҳи 7-туридан кейин Эрон 17 очко билан пешқадамлик қилаётган бўлса, 13 очко жамғарган Жанубий Корея иккинчи поғонада бормоқда. Ўзбекистон терма жамоаси 12 очко билан учинчи ўринни банд қилган. 4–6 ўринларни мос равишда Сурия (8 очко), Хитой (5 очко) ва Қатар (4 очко) термалари эгаллаган.
