Россиянинг НТВ телеканалидаги “Говорим и показываем” ток-шоуси сўнгги марта 14 апрель куни намойиш этилади, деб хабар берди Afisha.mail.ru нашри.
НТВ телеканали бошловчи Леонид Закошенский олиб борадиган “Говорим и показываем” номли ток-шоуни ёпишга қарор қилди. Телеканал раҳабариятининг бундай қарорга келишига кўрсатув рейтингининг тушиб кетгани, унда жанжалли масалалар кўтарилаётгани сабаб бўлди.
Кўрсатувнинг охирги сонини 14 апрель куни томоша қилиш мумкин. 17 апрелдан бошлаб эса унинг ўрнига телесериал намойиш этилади. Келгуси телемавсумда эса унинг ўрнини янги лойиҳа эгаллайди.
Каналнинг таъкидлашича, беш йил давомида ток-шоу бошқа каналлардаги шунга ўхшаш ток-шоулар билан муваффақиятли равишда рақобатлашганига қарамай, НТВнинг янгилаш стратегияси лойиҳасига киритилмаган.
“Говорим и показываем” ток-шоусининг бошловчиси Леонид Закошенский (илгари “Ты не поверишь!” кўрсатувчига бошловчилик қилган) телеканалда қолади. У “Тоже люди” кўрсатувига муаллифлик ва бошловчилик қилади. Телеканал куз ойида унинг иштирокидаги яна бир кўрсатувни эфирга узатади.
