АҚШда 13 ёшли ўсмир дўстлари билан Инстаграм ижтимоий тармоғидаги жонли эфир вақтида қўлидаги тўппончадан тасодифан ўзини отиб қўйди, деб хабар берди Vesti.ru нашри.
Малаки Хемфиллнинг онаси ва опаси 10 апрель куни унинг хонасидан ўқ овозини эшитишди. Улар хонага кирганда, Малаки бошидан яраланган ҳолда қонга беланиб ётарди. Боланинг ёнидаги телефонда эса ҳамон жонли эфир давом этарди. Малаки касалхонада оламдан ўтди. Бўлиб ўтган воқеани Интернет орқали кузатган Малакининг дўстлари ундан хабар олиш учун уйига келишди. Ўсмирнинг ўқ отар қуролни қаердан олганлиги ҳозирча номаълум, у қуролни танишларидан олган, деб тахмин қилинмоқда. Мазкур воқеага полиция ойдинлик киритмоқда. Малакининг ижтимоий тармоқдаги дўстлари текширилганда, унинг турли хил аккаунтлари мавжудлиги маълум бўлди.
