Қирғистон парламентининг собиқ депутати, сиёсатчи Садир Жапаровни қўллаб-қувватлаб, норозилик намойишида иштирок этган 12 нафар шахсга нисбатан жиноят иши қўзғатилди, деб хабар берди Tengrinews.kz нашри.
Мазкур шахслар жорий йилнинг 25 март куни Бишкек шаҳридаги МХХ биноси ёнида Қирғистон парламентининг собиқ депутати, сиёсатчи Садир Жапаровни қўллаб-қувватлаб, норозилик намойиши ўьказишди. Норозилик намойиши вақтида беш нафар милиция ходими турли даражадаги тан жароҳати олди.
Қирғизистон республикаси ИИВнинг берган маълумотига кўра, норозилик намойиши қатнашчилари ИИВнинг хизмат автобуси ойна ва эшикларини синдириб, моддий зарар ҳам келтирган. Мазкур қонунбузарликка йўл қўйишда гумонланган намойишнинг 12 нафар фаол иштирокчиси қўлга олиниб, адвокатлар иштирокида уларга нисбатан айблов эълон қилинди.
Бундан ташқари уларга нисбатан мол-мулкка зарар келтириш, безорилик, ҳукумат вакилларига нисабатан зўрлик ишлатиш айблари ҳам қўйилди. 64 нафар намойиш иштирокчиси 2 кундан 5 кунгача маъмурий қамоқ жазосига ҳукм қилинди, 12 киши жаримага тортилди, 2 нафар қатнашчига огоҳлантириш эълон қилинди, қолганлари билан эса профилактик суҳбат ўтказилди.
