Қирғизистон Президенти 2024 йил давомида 2,2 миллион қирғиз сомига яқин даромад олган. Бу ҳақда мамлакат Давлат солиқ хизмати маълум қилди.
Қирғизистон Давлат солиқ хизмати эълон қилган 2024 йил учун давлат ва муниципал хизматчиларнинг декларациялари бўйича умумлаштирилган маълумотларга кўра, Президент Садир Жапаровнинг йиллик даромади 2 миллион 214 минг 482,38 қирғиз сомини (тахминан 305,6 миллион сўм) ташкил этган. Декларацияда давлат раҳбарининг харажатлари кўрсатилмаган.
Маълумотларга биноан, Президент мулкида 2 627 квадрат метрли бизнес-марказ, Иссиқкўл вилояти Тюп туманида жойлашган 63 сотих қишлоқ хўжалиги ери ҳамда 21 сотих ер участкаси мавжуд. Кўчар мулк сифатида эса 100 минг сомга баҳоланган “Жигули” автомобили қайд этилган.
Шунингдек, декларацияда 1 миллиард 163,5 миллион сом пул маблағлари легаллаштирилган маблағлар сифатида кўрсатилган. Қайд этилишича, Президентнинг яқин қариндошлари 2024 йил давомида 29 миллион 706 минг 840 сўм даромад олган.
