Туркиянинг Ялова вилоятида полиция ва ИШИД жангарилари ўртасида содир бўлган отишма оқибатида уч нафар полициячи ҳалок бўлди. Бу ҳақда мамлакат Ички ишлар вазири Али Ерлиқоя маълум қилди.
Маълум қилинишича, тўқнашув террорчиликда гумон қилинган шахслар яширинган уйга полиция бостириб кирган пайтда бошланган. Операция давомида олти нафар жангари йўқ қилинган, саккиз нафар полиция ходими ва бир нафар қўриқчи турли жароҳатлар олган.
Бинода бўлган беш нафар аёл ва олти нафар бола хавфсиз тарзда эвакуация қилинган. Операция маҳаллий вақт билан тунги соат 2:00 да бошланиб, эрталаб 9:40 да якунланган.
Ички ишлар вазирининг таъкидлашича, ушбу рейд ИШИД’га қарши Туркиянинг 15 вилоятида бир вақтнинг ўзида ўтказилган кенг кўламли аксилтеррор тадбирларидан бири ҳисобланади.
