Афғонистоннинг айрим ОАВи Покистоннинг собиқ бош вазири Имрон Хон Адиала қамоқхонасида “сирли тарзда” вафот этгани ҳақида хабар тарқатди. Улар сиёсатчининг жасади қамоқхонадан олиб чиқилганини ҳам иддао қилинди. Бу ҳақда Zamon.uz маълум қилди.
Бироқ бу маълумот ҳозирча Покистон ҳукумати, Адиала қамоқхонаси маъмурияти ёки Имрон Хоннинг партияси — PTI томонидан тасдиқлангани йўқ. Етакчи халқаро ахборот агентликлари ҳам ҳозирча бу ҳақда расмий хабар бермаган.
Тарқалган хабарлардан сўнг ижтимоий тармоқларда шов-шув кучайди ва Имрон Хон тарафдорларининг қамоқхона атрофида тўпланаётгани ҳақидаги постлар тарқала бошлади.
Маълумот учун, Имрон Хон бир қатор жиноят ишлари бўйича айбланиб, қамоқда сақланаётган эди. Сиёсатчининг соғлиғи ёки ўлими ҳақидаги тасдиқланмаган хабарлар аввал ҳам бир неча бор тарқалиб, кейин рад этилган.
