Наманган шаҳрида аттестациядан ўтувчи педагогларга масофадан туриб ноқонуний ёрдам кўрсатишга мўлжалланган “бункер” фаолияти аниқланиб, тўхтатилди. Бу ҳақда ДХХ хабар берди.
Давлатобод туманидаги умумий ўрта таълим мактаби директори ўринбосари, Наманган давлат техника университети бўлим бошлиғи, бўлим мутахассиси ва уларнинг шериклари ўзаро тил бириктириб, малака тоифаларини белгилаш учун ўтказилган аттестацияга оид тест синовларида ўқитувчиларга моддий манфаат эвазига ёрдам кўрсатиб келганликлари аниқланган.
Тезкор тадбир давомида “бункер” сифатида фойдаланилган хонадон кўздан кечирилди. Унда тест саволларини ечишга жалб қилинган 12 нафар ўқитувчи аниқланиб, бир нечта ноутбуклар, 30 дона турли эшитиш мосламалари, яширин камералар, 8 дона Wi-Fi роутер ва бошқа техник воситалар ашёвий далил сифатида олинди.
Терговга қадар текширув давомида мазкур шахслар вилоятдаги бир қатор ўқитувчилардан имтиҳон натижаларини ижобий ҳал қилиб беришни ваъда қилган ҳолда 1300–1500 АҚШ доллари миқдорида пул талаб қилиб, фақат 2024-йилнинг сентябрь–октябрь ойларида 25 минг доллардан ортиқ маблағ йиғиб олганликлари маълум бўлди.
Ҳолат юзасидан Жиноят кодексининг 168-моддаси 3-қисми “б” банди ва 28,211-моддаси 2-қисми “а” банди билан жиноят иши қўзғатилиб, тергов ҳаракатлари олиб борилмоқда.
Шунингдек, мактаб директори ўринбосари ҳамда “бункер”ни бошқарган 2001-йилда туғилган фуқаро аввал ҳам худди шундай жиноят содир этгани учун жавобгарликка тортилган шахслар ҳисобланади.
