Форум “Марказий Осиё: умумий маънавий-маърифий мерос – умумий келажак” мавзусида ўтмоқда. Президент Шавкат Мирзиёев конгресс иштирокчиларига йўллаган қутлов сўзида тинчлик ва барқарорликни асраш, илм ва маърифат орқали ҳамжиҳатликни мустаҳкамлаш бугунги кунда энг муҳим вазифалардан эканини таъкидлади.
“Ишончим комилки, бугунги форум илмий ва маданий мулоқот учун самарали майдон бўлади”, — деди Президент Мирзиёев.
Конгрессда халқаро ташкилотлар, дипломатлар, Марказий Осиё мамлакатлари ва Озарбайжондан келган олимлар, маданият ва дин арбоблари иштирок этмоқда. Тадбир минтақамиз халқларининг маънавий ва илмий меросини умумий келажак асоси сифатида таҳлил этишга қаратилган.
Конгресс аввалида энг муҳим воқеалардан бири — Ҳазрати Усмон (р.а.) даврида кўчирилган муқаддас Усмон Мусҳафининг Ислом цивилизацияси марказига кўчирилиши бўлди. Шу муносабат билан Ўзбекистон мусулмонлари идораси фаолияти ҳам энди ушбу марказда давом эттирилади.
Биринчи куннинг муҳокамаларида фан, маданият, ёшлар сиёсати, кино ва адабиёт соҳаларида ҳамкорликни кучайтириш бўйича қатор ташаббуслар илгари сурилди. Фанлар академиялари президентлари қадимий қўлёзмаларни ўрганиш ва археология соҳасида қўшма лойиҳаларни амалга ошириш истиқболларини муҳокама қилдилар.
Конгресс доирасида “Марказий Осиё тарихий мероси: ягона ўтмиш – умумий келажак” форуми, “Буюк ўтмиш ва буюк келажак” кўргазмаси, “Тирик тарих” халқаро кино форуми ва бошқа тадбирлар ҳам ўтказилмоқда.
Ислом цивилизацияси марказида бўлиб ўтаётган ушбу анжуман Марказий Осиё халқларининг умумий илмий ва маданий меросини яна бир бор намоён этди. Форум 15 ноябрга қадар давом этади.
