Бугун, 6 ноябрь куни “Ҳудудий электр тармоқлари” АЖнинг “Электр энергия сотишни автоматлаштириш маркази” филиалида пресс-тур ташкил этилди.
Унда, ижтимоий тармоқларда 2025 йилнинг 1 ноябрь кунидан бошлаб Ўзбекистонда чиқиндидан қарзи бор хонадонлар электр таъминотидан узиб қўйилиши ҳақида хабарларга аниқлик киритилди.
Масъуллар журналистларга маълум қилишича, вазият аҳоли орасида, шунингдек, ОАВда нотўғри талқин қилинмоқда.
"Аслида бу сал бошқачароқ, яъни президентининг 5-сонли фармони бор. Бу фармонда шу чиқинди тўловларини тартибга солиш, тўлов интизомини шакллантириш мақсадида вазифа юклатилган. Бу шундан иборатки, агар чиқиндидан қарзингиз бўлса, 2100 қисқа рақам орқали смс-хабарномаси юборилиб, огоҳлантириласиз. Агар беш кун муддат ичида ҳам чиқиндидан қарздорлик бартараф этилмаса, шунда электр энергия учун тўлов чекланади. Бирданига узиб қўйилмайди. Тўлов чеклангандан кейин ҳисобингиздаги тўлов миқдори ишлатилиб уч кун, беш кун, балки кўпроқ бўлса 10 кундан кейин барибир тугайди. Шу тугагандан кейин, тизим сизни тармоқдан автомат узади. Шу томонлама чекланади. Чиқиндидан қарзи бор истеъмолчи тўғридан тўғри электр токидан узиб қўйилмайди, - дейди АЖ масъули.
