Бошқарманинг хабар беришича, Асан қишлоғидан Форт-Шевченко пляжигача 39 та, Форт-Шевченко пляжидан Баутино бурнигача эса 73 та тюлень жасади топилган.
Экология бошқармаси мутахассислари денгиз суви намуналарини тўплаб, тюленларнинг ўлим сабаблари бўйича текширув бошлади.
Каспий тюленлари фақат Каспий денгизида яшовчи ягона сутемизувчи ҳисобланади. Уларнинг узунлиги тахминан 1,5 метр, оғирлиги эса 80 кг атрофида. Тюленлар асосан килка ва бошқа балиқлар билан озиқланади, қишда эса муз устида битта болани дунёга келтиради.
Мутахассислар таъкидлашича, Каспий тюленлари сони кескин камайиб, йўқолиб кетиш хавфи остида. Ҳар йили уларнинг ўлими кузатилади, аммо аниқ сабабини топиш кўпинча имконсиз бўлади.
