Ижтимоий тармоқларда Тошкент шаҳрида жами 144 туп дарахт амалдаги мораторий талабларига зид равишда кесиб ташлангани ҳақида хабарлар тарқалди.
Экология вазирининг маслаҳатчиси Расул Кушербаевнинг маълумот беришича, ҳодиса Яккасарой туманида — Нукус ва Бобур кўчалари кесишмасидан бошлаб, Бобур кўчаси бўйлаб жойлашган автомобиль йўли ёнида содир бўлган.
Дастлабки ҳисоб-китобларга кўра, табиатга етказилган зарар 620 миллион 472 минг сўмни ташкил этмоқда.
Расул Кушербаев мамлакатдаги экологик қонунбузарликлар ҳақида видеомурожаат билан чиқди.
"Бу ҳақиқатни халқ ҳам, президентимиз ҳам билишлари керак", — деди у видеода.
Кушербаев видеомурожаатида сўнгги пайтларда мораторий талабларига зид равишда дарахтлар оммавий кесилаётгани, атроф-муҳитни муҳофаза қилиш соҳасида масъулиятсизлик ҳолатлари кўпаяётганини кескин танқид қилди.
Шунингдек, у “Навоийазот” корхонаси фаолияти туфайли шаҳар ҳавоси заҳарланаётганини таъкидлаб, бу муаммога нисбатан қатъий чора кўриш вақти келганини билдирди.
Бугун экологиянинг душмани — ҳокимиятлар. Оддий фуқаро экологик йўналишда қоидабузарлик қилса, уни жазолашади. Лекин асосий катта қонунбузарликлар — ҳокимлар ва уларнинг ўринбосарлари томонидан содир этиляпти. Уларга эса кўз юмиляпти. Прокуратура ҳам бу бўйича чора кўрмаяпти”, - дейди экология фаоли.
Кушербаевнинг сўзларига кўра, бу каби жиддий экологик муаммолар ҳақидаги маълумотлар кўпинча президент ҳамда Саида Мирзиёевага етиб бормаётгани ҳолатни янада оғирлаштирмоқда.
Унинг фикрича, экологик назорат кучайтирилмаса ва масъуллар ўз вақтида жавоб бермаса, бу фуқаролар саломатлиги ҳамда табиат учун катта хавф туғдиради.
