Ўзбекистонда келаси йилдан бошлаб қуриладиган турар жой объектлари номи фақат давлат тилида ёзилади. Ҳукуматнинг 22 октябрдаги қарори билан қурилиш соҳасидаги норматив-ҳуқуқий ҳужжатларга ўзгартириш ва қўшимчалар киритилди.
Қарорга кўра, 2026 йил 1 январдан турар жой мажмуаларини қуришда объект номи давлат тилида бўлади ҳамда давлат тили қоида ва талабларига риоя этган ҳолда ёзилиши лозим.
Қурилиш объектлари лойиҳалари акс этган бино паспорти, пешлавҳаси, қурилиш майдонлари атрофидаги вақтинча девор ва тўсиқлардаги барча ёзувлар, жумладан, реклама ва эълонлар матнлари давлат тилида ёзилади.
Объектларда қурилиш-монтаж ишларини бошлаш учун рухсатнома олишда ҳамда улардан фойдаланишга рухсатнома беришда муаллифлик, техник ва ички назоратни амалга ошириш билан боғлиқ ҳужжатлар Қурилиш ва уй-жой коммунал хўжалиги соҳасида ҳудудий назорат қилиш инспекцияларига тақдим этилади.
Тегишли вазирлик ва агентликлар билан бирга бир ой муддатда “Э-ХСУД” ахборот тизимини, шунингдек, экология соҳасида рухсатномалар бериш электрон тизимини Иқтисодиёт ва молия вазирлиги ҳузуридаги Кадастр агентлигининг “Кадастр ва рўйхатдан ўтказиш интеграциялашган ахборот тизими” ҳамда “Шаффоф қурилиш” ахборот тизими билан интеграция қилади.
Ушбу қарор расман эълон қилинган кундан бошлаб 3 ойдан сўнг кучга киради.
