Жорий йил 17 октябрда «Ўзбекистон темир йўллари» АЖга қарашли темирйўл вокзали, темирйўл стансияси ва темирйўл разъезди номларини давлат тили қоида ва меъёрлари асосида қайта номлаш чора-тадбирлари тўғрисида”ги Ҳукумат қарори қабул қилинди.
Унга кўра, «Ўзбекистон темир йўллари» АЖ ва Транспорт вазирлиги 3 ой ичида республикадаги 320 та темирйўл объекти — вокзал, стансия ва разъездлар номларини давлат тили меъёрларига мувофиқ лотин ёзувида қайта тартибга келтиради.
Бундан кўзланган мақсад темир йўл тармоғида ягона тил стандартини жорий этиш ва ўзбек тилининг нуфузини кенгайтиришдан иборат. Барча пешлавҳалар, ахборот белгилардаги ёзувлар ва расмий ҳужжатлардаги номлар лотин ёзувига асосланган ўзбек алифбосига мос тарзда янгиланади.
Қарорга кўра, 3 ой ичида янги номлар барча объектларда қўлланилиши талаб этилади. Ўзгартирилган номлар маълумотлар базаларига киритилади, ҳуқуқий ҳужжатлар, расмий ёзувлар мослаштирилади.
Ўзгаришлар орқали давлат тилининг имкониятлари кенгайтирилади ва ёзув ҳам бир-бутун шаклга келтирилади. Шунингдек, темирйўл тармоғи томонидан фойдаланиладиган номлар халқаро ҳамда маҳаллий алоқаларда аниқлик киритади.
