Ўзбекистон миллий жамоаси 13 октябрь куни Малайзияда Уругвай билан ўртоқлик ўйинини ўтказиб, 1:2 ҳисобида ютқазди. Бош мураббий Фабио Каннаваро Уругвайга қарши ўртоқлик ўйинидан кейин ўз фикрларини айтди.
“Афсуски бу ўйинда 9 футболчимиз жароҳат туфайли қатнаша олмади. Мен учун барча футболчиларни кўрикдан ўтказиш муҳим эди, улар билан кўпроқ вақт ўтказиш, кўпроқ нарсаларни яхшилашга ҳаракат қилиш. Уларнинг иштиёқидан, ҳаракатларидан жуда хурсандман. Осон эмас эди, чунки 2 кун олдин учиб келдик, яхши ҳордиқ чиқариш ҳам қийин бундай вазиятда. Лекин жуда яхши ўйин ўтказдик”, — дейди Каннаваро.
Шунингдек, бош мураббий бундай ўйинларда гол уриш муҳимлигини ва олдинроқ ҳам гол уриш имконияти бўлганини билдириб, 2-3 та яхши вазият бўлганини айтган.
“Ўтган иккита ўйиндан кейин хурсандман, қўлимда жуда яхши жамоа бор. Лекин биз уни янада яхшилашимиз керак. Бизда (жаҳон чемпионатигача) 8 ой вақт бор, жисмоний ҳолатимизни яхшилаш учун. Лекин бу фақат машғулотга боғлиқмас, кўп нарсага боғлиқ: овқатланиш, ухлаш, кундалик машғулотлар. Биз жаҳон чемпионатига босқичма-босқич тайёрланишимиз керак, чунки қийин бўлади. Миллий жамоа ноябрь ойида иккита ўйинга келишган, бу Дубайда бўлади. Ўзбекистонда қолиб, миллий чемпионат ўйинларини кузатаман, машғулотларга бораман, футболчилар билан кўришаман, мураббийлар билан танишаман. Миллий жамоа мураббийининг иши шундан иборат”,— дейди у.
