1 октябрдан бошлаб Қозоғистон Республикасида машҳур ўзбек сериали “Қизим” (“Менинг қизим”) намойиш этила бошлади. Сериални намойиш этиш ҳуқуқини мамлакатнинг йирик телеканалларидан бири — “Қозоғистон” телеканали эксклюзив тарзда қўлга киритди.
“Қизим” Ўзбекистондаги энг йирик продакшн компанияларидан бири — Cinemedia томонидан суратга олинган бўлиб, аввалроқ “Севимли” телеканали орқали эфирга узатилган ва томошабинлардан юқори — 10/10 рейтингни олган.
Сериал 2024 йилда экран юзини кўрган бўлиб, 80 қисмдан иборат бир мавсумни ўз ичига олади. Режиссёр — Самидхон Лутфуллаев, сценарий муаллифи — Гўзал Муҳаммедова. Асарда Раъно Шодиева, Раъно Зокирова, Жавоҳир Зокиров, Меҳриддин Раҳматов каби машҳур актёрлар иштирок этган.
Драма уч аёл — Диёра, Гавҳар ва Нигина ҳаётида юз берадиган синовлар, мураккаб танловлар ва инсоний қадриятлар ҳақида ҳикоя қилади. Сериал севги, оилавий муносабатлар ва ахлоқий қарорларнинг оқибатларини ёритиб, томошабинларни чуқур мушоҳадага чорлайди.
