Тожикистонда вояга етмаганларнинг ижтимоий тармоқлардан фойдаланишини чеклаш масаласи муҳокама қилинмоқда. Парламент қуйи палатаси депутати Дилноза Аҳмадзода 14 ёшгача бўлган болаларга ижтимоий тармоқлардан фойдаланишни бутунлай тақиқлашни таклиф қилди.
Аҳмадзода ўз ташаббусини расмий “Халқ газетаси”да чоп этилган мақоласида илгари сурган. У 2025 йил “Бола ҳуқуқларини ҳимоя қилиш тўғрисида”ги қонунга ёлғон ва зарарли ахборотни тарқатиш бўйича ўзгартиришлар киритилган бўлса-да, бу етарли эмас деб ҳисоблайди.
“Болалар ва ўсмирларнинг ижтимоий тармоқлардан фойдаланишини назорат қиладиган қўшимча ўзгартиришлар киритиш керак”, деб ёзган депутат.
Таклиф бўйича, 14 ёшгача бўлган болаларнинг ижтимоий тармоқларга кириши бутунлай тақиқланиши лозим. 14 ёшдан 17 ёшгача бўлган ўсмирлар эса ижтимоий тармоқлардан фақат ота-оналарининг ёзма розилиги билан фойдаланиши керак.
Бироқ рақамли технологиялар ва инсон ҳуқуқлари соҳасидаги мутахассислар бундай таклифларга эҳтиёткорлик билан ёндашмоқда. Улар тўлиқ тақиқ нафақат амалда қийин, балки асосий муаммоларни ҳам ҳал қилмаслигини айтган.
“Биз ўсмирларни шунчаки интернетдан узиб қўйиб, бу билан уларни ҳимоя қиламиз, деб ўйламаслигимиз керак. Тақиқлар ўрнига маърифий ишлар зарур: рақамли гигиенани ўргатиш, танқидий фикрлашни ривожлантириш, ота-оналар ва ўқитувчиларни жалб этиш керак”, — дейди исмини ошкор қилишни истамаган медиа-экспертлардан бири.
