АҚШнинг махсус элчиси Стив Уиткоффнинг сўзларига кўра, президент Доналд Трамп Россия ва Украинани урушни тугатиш бўйича тўғридан-тўғри музокараларга ўтиришга чақирган. Бу ҳақда у “Breitbart News” нашрига берган интервьюсида айтиб ўтди.
“Трамп бу музокаралар тез фурсатда бошланиши кераклигини таъкидлади. Акс ҳолда, у АҚШ бу можарога аралашмаслиги керак, деган фикрда. Бу нима дегани бўлишидан қатъи назар, Қўшма Штатлар четга чиқиши керак”, – дейди Уиткофф.
Унга кўра, АҚШнинг музокаралардан чиқиши “барча томонлар учун ёмон натижа” бўлади.
Уиткоффнинг айтишича, эҳтимолий музокараларда муҳокама қилинадиган асосий масалалар қуйидагилар: Россия эгаллаб олган ҳудудлар, Запороже АЭСи устидан назорат ва украиналикларнинг Днепр ва Қора денгизга чиқиш ҳуқуқи.
“Бу масалаларнинг кўпини ҳал қилиш қийин бўлмайди, агар томонлар музокара столига ўтирсалар. Биз улар ўртасидаги масалалар доирасини торайтирамиз, кейин эса муросали ва ижодий ечимлар топамиз”, – дейди АҚШ вакили.
Маълумот учун, Уиткофф 2025 йил февралидан буён Россияга уч марта ташриф буюриб, президент Владимир Путин билан учрашган. Украина президенти Владимир Зеленский эса Уиткоффни “Россия тарғиботини тарқатаётганликда” айблаган.
