Россия қуролли кучлари 9 май сулҳга қарамай, Украина ҳудудларини тинимсиз ўққа тутмоқда. Запороже вилояти раҳбари Иван Федоровнинг маълум қилишича, сўнгги суткада Россия томонидан 150 дрон ва 70 артиллерия ҳужуми амалга оширилган. Бу ҳужумлар оқибатида бир нафар аёл ҳалок бўлган.
Херсон вилоятида ҳам дрон ҳужуми оқибатида 60 ёшли эркак оғир тан жароҳати олган. Вилоят раҳбарлари Россия кучлари вилоятдаги 20 та аҳоли пунктига ўт очганини билдирди.
Днепропетровск вилоятидаги Никопол шаҳри ва атроф ҳудудлар ҳам нишонга олинган. 83 ёшли эркак яралангани, айрим жойларда ёнғин юзага келгани маълум қилинди.
Бу орада Россиянинг Белгород ва Курск вилоятларида дронлар хавфи сабабли ҳаво ҳужумидан огоҳлантириш эълон қилинди. Белгород вилояти губернатори Вячеслав Гладков дронлар вилоят маъмурияти биносига ҳужум қилганини, ҳаттоки дрон унинг кабинетига йўналган бўлиши мумкинлигини айтди.
