Исроил бош вазири Бинямин Нетаняху Бен-Гурион халқаро аеропорти яқинига ҳусийлар томонидан йўлланган ракета ҳужумига жавобан мамлакат “кўп йўналишли” зарбалар беришини маълум қилди. Бу ҳақда Нетаняху видеомурожаат орқали баёнот берди.
“Биз илгари ҳам ҳаракат қилганмиз, бундан кейин ҳам ҳаракат қиламиз. Бу ягона зарба эмас – жавобимиз кўп бўлади”, — дейди у.
Исроил мудофаа вазири Исроел Каc ҳам кескин огоҳлантирди: “Ким бизга зарба берса, биз ундан етти баравар кучли жавоб қайтарамиз”, — дея унинг сўзларини АФП келтирган.
НДТВ маълумотига кўра, ҳусийлар томонидан Яман ҳудудидан учирилган баллистик ракета Тел-Авивдаги Бен-Гурион аеропортининг 3-терминалидан атиги 75 метр узоқликда ерга тушган. Портлаш натижасида ерда 25 метр чуқурликда кратер пайдо бўлган.
Воқеа ортидан бир қатор халқаро авиакомпаниялар Исроилга парвозларни вақтинча тўхтатган. Расмийлар жабрланганлар ҳақида маълумот бермаган.
