Россиянинг Владивосток шаҳрида “Ғалаба набиралари” (“Правнуки Победы”) номли болалар ҳарбий паради ўтказилди. Бу ҳақда Приморе губернатори Олег Кожемяко ўзининг расмий каналида маълум қилди.
Тадбирда вилоятдаги бошланғич синф ўқувчиларидан иборат 1500 нафардан ортиқ бола ҳарбий форма кийиб, шаҳарнинг марказий кўчалари бўйлаб саф тортиб ўтди. Улар турли қўшин турлари ва кўнгилли жанговар отрядларни рамзий тарзда гавдалантирди.
Парадни трибуналардан Шимолий Кореядан (КХДР) келган мактаб ўқувчилари ҳам кузатди. Губернатор Кожемяко буни КХДР ҳарбийларининг “Курск вилоятида Украина Қуролли Кучларига қарши жангларда фаол иштирок этгани” билан изоҳлади.
Тадбир Россияда 9 май — Ғалаба куни арафасида ташкил этилган ҳарбий-ватанпарварлик руҳидаги оммавий акциялардан бири ҳисобланади.
