Ушбу тестни АҚШлик машҳур психотерапевт Альберт Эллис ишлаб чиққан. Унинг ёрдамида ўзингизни янада чуқурроқ англашингиз, муаммоларингизнинг сабаб ва ечимини тушунишингиз мумкин бўлади.
Топшириқ
Кўзларингизни юминг-да, айиқни тасаввур қилинг. Энди оқ қоғоз олиб, оддий ёки рангли ручкалар ёрдами (фломастер ёки рангли қалам ишлатсангиз ҳам бўлади) айиқ расмини чизинг. Сурат аслидек чиқиши шарт эмас. Уни истаган рангга бўяшингиз, ўзингиз хоҳлагандек шакл беришингиз мумкин. Топшириқни 5-6 дақиқа ичида тугатишингиз керак.
Изоҳлаймиз!
- Дастлаб, расм қоғознинг қайси қисмида чизилганига аҳамият беринг. Агар уни қоғоз ўртасига чизган бўлсангиз, демак, холис фикрлайдиган инсонсиз. Бордию расм қоғознинг юқори қисмидан бошланган бўлса, ўзингизги ҳаддан зиёд ишонасиз. Расмнинг қоғозни пастки қисмидан бошланиши эса ўзингизга ишончингиз пастлигини билдиради.
- Жониворнинг боши қайси тарафга қараган? Чап томонга қараб тургани муаммоларни узоқ таҳлил қилишингизга ишора. Ўнг томонга қаратиб чизилгани эса қарор чиқаришга шошилишингизни билдиради. Агар ҳайвоннинг боши тўғрига қараб турган бўлса, бу сиздаги худбинликни англатади.
- Қулоқлари борми? Агар айиқнинг қулоқларини катта қилиб чизган бўлсангиз, сизда одамларни тинглаш қобилияти бор. Бироқ ҳар доим ҳам ўзингиз истаган фикрни тўғри етказиб беролмайсиз. Агар жониворингиз «қулоқсиз» бўлса, гап-сўзларга ҳушингиз йўқлигидан далолатдир.
- Оғзи. Суратдаги айиқ кулиб турган кўринишда бўлса, муаммоларингизни атрофдагиларга билдирмайдиган инсонсиз. Жиддий қиёфа муаммолар ортига яширинишнинг белгиси.
- Кўзлар. Агар айиқнинг кўзлари катта (ҳудди бир нимадан ҳайратланаётгандек) очилган бўлса, ўзгаларнинг таъсирига тушиб қолишингиз, қўрқув ҳисси борлигини билдиради. Бордию айиқ кўзлари кичик, устма-уст бўяб чизилган (баъзилар киприкларини ҳам чизишади) бўлса, сизга эътибор етишмаётганинг белгиси бўлади.
- Қўл панжаси. Диққат қилинг, агар айиқ панжаси очиқ кўринишда чизилса, оптимист инсонсиз. Панжаси мушт тугилган ёки орқага яширилгани эса гап-сўзлардан чўчишингизни билдиради.
