Бу воқеа 1986 йилнинг 5 сентябрида Покистоннинг Карачи шаҳрида рўй берган эди, деб хабар берди “Love-psy.ru” нашри.
Ўшанда Американинг Pan American авиакомпаниясига тегишли самолётни террорчилар қўлга олди. Агар жасур стюардесса Ниржа Бханот бўлмаганда, юзлаб одамлар ҳалок бўларди. У бошқаларни қутқариш учун ўзини қурбон қилди.
Ниржа Мумбайда ўрта мактабни тугатгандан кейин бироз модель бўлиб ишлади, дунёга донғи кетган брендларнинг либосларини намойиш этди. 1985 йилда ота-онасининг хоҳиши билан турмушга чиқди, аммо куёвнинг қариндошлари унинг сепидан норози бўлганликлари туфайли қизни уйига қайтариб юборишди. Бахтсиз никоҳдан кейин Ниржа Pan American авиакомпаниясининг РА 73 рейсига стюардесса бўлиб ишга кирди.
Ўша куни Мумбайдан соат 05:00 да учган самолёт Покистоннинг Карачи шаҳрига қўнганда, уни тўрт нафар террорчи йўловчилари ва экипаж аъзолари билан бирга қўлга олди. Ниржа бир зумда нима воқеа рўй берганини англаб, учувчиларни ҳодисадан воқиф этди, улар заҳира люки орқали самолётни тарк этишди.
Аввалига террорчилар йўловчиларга қарата ўт очган бўлса, кейин улардан паспортларни кўрсатишни талаб қилди. АҚШ фуқароси бўлган шахсларни бирин-кетин ўққа тутди. Аммо Ниржа бошқа йўловчиларнинг паспортларини тезкорлик билан ахлат қувурга яширди. Шундан кейин террорчилар бошқа АҚШ фуқароларини аниқлай олмади.
Покистон полицияси самолётни қутқариш учун ҳужум қилган вақтда пайтдан фойдаланган Ниржа отишма, гранаталар портлашига қарамай, бошқа йўловчиларни қутқаришга ҳаракат қилди. Ўзи энди самолётдан чиқиб кетаётганда ўриндиқлар тагига беркиниб, қўрқиб ўтирган уч нафар болакайга кўзи тушди.
У ортига қайтиб, болаларни қутқараётган вақтда террорчилар уни кўриб қолиб, ўққа тутишди. Ниржа болаларга танасини қалқон қилди, аммо ўзи қурбон бўлди. У қутқарган болалардан бири кейинчалик учувчилик касбини эгаллади.
Ниржа Бханот ўлимидан кейин кўрсатган жасорати учун Ҳиндистоннинг энг юксак мукофоти — Ашока Чакра орденига сазовор бўлди. У тинчлик пайтида бундай мукофотга лойиқ кўрилган энг ёш инсон ҳисобланади.
