Қонунда айтилишича, ҳайвонларни эвтанизация қилиш тақиқланади. Шу билан бирга, парвариш қилинадиган ҳайвонлар даволаб бўлмайдиган касалликларга чалинган ёки ўткир юқумли касалликлар ташувчиси бўлган ҳолларда ветеринария шифокорининг қарори билан эвтанизация қилиниши мумкин. Бу ҳақида zamon.uz хабар бермоқда.
Туркия Буюк Миллат Мажлиси (парламенти) томонидан қабул қилинган ва тасдиқланган қонунга мувофиқ, барча қаровсиз итлар тўпланиб, ҳайвонлар бошпанасига олиб кетилади. Ҳайвонлар бошпанасига жойлаштирилган итлар стерилизация қилинади ва асраб олинади. Шунингдек, уй ҳайвонларини кўчага ташлаб кетганлар 60 минг турк лираси миқдорида жаримага тортилади.
Ҳужжатга кўра, қаровсиз итларни йиғмаган ва қонун ҳужжатларига риоя қилмаган ҳокимлик раҳбарлари 6 ойдан 2 йилгача озодликдан маҳрум қилинади. Маълум қилинишича, мушук ва ит эгалари 2025 йилгача уй ҳайвонларини рақамли идентификатор ёрдамида рўйхатдан ўтказишлари керак бўлади.
