Асакалик ота қизи вояга етгунгача бўлган алиментини тўлади. Бу ҳақда МИБ darakchi.uz'га хабар берди.
Фуқаролик ишлари бўйича Асака туманлараро судининг суд буйруғига асосан З.О. бир нафар қиз фарзанди учун 2009 йилдан буён алимент тўлаб келади.
З.О.нинг қизи ҳозирда 17 ёшда, келгуси йил 18 ёшни қаршилайди. Қонунчиликка кўра, алимент тўловлари фарзанд вояга етгунга қадар тўланади.
Ота қизининг бир йилдан сўнг вояга етишини инобатга олган ҳолда алимент пулларини олдиндан тўлаб бериш истагини билдирди.
Фарзанд вояга етгунга қадар ҳисобланган алимент миқдори 35 млн. 603 минг сўмни ташкил этди ва қарздор З.О. ушбу пулларни тўлиқ ҳажмда тўлади.
Алимент тўлови олдиндан ундирилгани сабаб ижро иши ҳам якунланди.
