Америка Қўшма Штатларига ноқонуний йўллар орқали кетган 119 нафар ўзбекистонлик ватанга қайтарилди. Бу ҳақда Ташқи меҳнат миграцияси агентлиги хабар қилди. Маълум қилинишича, уларнинг кўпчилиги Америкага Мексика давлати орқали ўтишга ҳаракат қилган. У ерга боргунча йўлларда турли қийинчиликларга дуч келишган.
Маълумотларга кўра, 2021 йилнинг октябридан 2023 йилнинг октябригача АҚШ чегарасини ноқонуний кесиб ўтган 13 мингдан ортиқ ўзбекистонлик қўлга олинган.
"Мен билан бирга кетган ўртоғимнинг поччаси ўша ерда экан. Магазинда ишлаймиз, ойига 10-12 минг АҚШ доллари пул топамиз деганига ишониб, ҳавас қилиб кетгандик. 3 сентябрь куни боргандик. 110 кун қамоқда ушлаб туришди, нон ейишмас экан, нон беришмади бизга. У ернинг қамоқхоналари бой-камбағалга қарамайди. Қийинчиликларни бошдан ўтказиб, бугун юртимизга қайтиб келдик", - дейди қайтиб келганлардан бири.
Унинг айтишича, у Америкага бориш учун 2-3 йилда топган пулини 3 ойда кўчага ташлаб келган. У Мексикагача 30 кун йўл босган. Америкага ўтказиб қўйиш учун эса чегарада ундан 5 минг АҚШ доллари сўрашган.
Ошпазлик қилмоқчи бўлган яна бир ўзбекистонлик эса 4 ой Америка қамоқхонасида сақланган ва анча катта пулидан айрилган. Яна бир одам эса, Амрерикада иш топиш осон эмаслиги, ҳатто 3-4 ойлаб иш топа олмай қолиб кетган аёллар борилиги маълум қилган. Унга кўра, айни пайтда АҚШда Марказий Осиё давлатлари фуқаролари учун рейдлар бошланган.
