Россия президенти матбуот котиби Дмитрий Песков Твер вилоятида ҳалокатга учраган Еmbraer Legacy 600 бизнес-жети бортида ҳалок бўлган Вагнер ПМС асосчиси Евгений Пригожиннинг дафн маросими қачон ва қандай ўтказилишини Кремль билмайди, деди. Бу ҳақда "Коммерсант" хабар бермоқда.
“Дафн маросими ҳақида ҳозирча ҳеч қандай маълумотга эга эмасман, шунинг учун ҳеч нарса дея олмайман. Шубҳасиз, қарор қабул қилиниши биланоқ у оммага эълон қилинади. Бундай қарорлар ҳамиша қариндошлар билан биргаликда қабул қилинади ва биринчи навбатда қариндошларнинг қарорига асосланади”, — деди Кремль матбуот котиби.
Владимир Путиннинг Евгений Пригожиннинг дафн маросимида иштирок этиши мумкинми деган аниқ саволга Дмитрий Песков шундай жавоб берди: "Биз қачон, қандай (дафн маросими бўлиб ўтишини) ҳали билмаймиз, шунинг учун ҳозир бу саволга жавоб бўлиши мумкин эмас".
Эслатиб ўтамиз, 23 август куни Еmbraer Legacy 600 бизнес-жети ҳалокатга учради. Самолётда 10 киши, жумладан Евгений Пригожин ва Вагнер ПМС командири Дмитрий Уткин бўлган. Етти йўловчи ва уч экипаж аъзоси ҳалок бўлди. 27 август куни Евгений Пригожиннинг ўлими тасдиқланди.
Владимир Путин 24 август куни авиаҳалокатга изоҳ берди. У ҳамдардлик билдирар экан, у Евгений Пригожинни анчадан бери билишини таъкидлади. Путин уни тақдири оғир бўлган истеъдодли инсон деб атади.
