Қозоғистон ҳукумати июнь ойида мамлакатда қўлга олинган F.A.C.C.T. компанияси ходими россиялик Никита Кислицинни экстрадиция қилишдан бош тортди.
Бу ҳақда ТАСС агентлигига Россия Федерациясининг Олма-Отадаги бош консуллиги консул маслаҳатчиси Артем Оганов маълум қилди.
“Суд қарори билан Кислицин Россия талабига биноан 12 ой муддатга экстрадиция ҳибсга олинган, АҚШга экстрадиция бўлмайди”, — деди у.
Кислицин “ватанига қайтиш ниятида эканлиги” ва бошқа вариантларни, жумладан, Қозоғистондан бошпана сўрашни ҳам кўриб чиқмаслигини айтган.
Никита Кислицин Россияда F.A.C.C.T.да киберҳужумларга қарши комплекс чора-тадбирларни ишлаб чиқиш бўйича департамент раҳбари бўлган. У товламачиликда ва қонун билан ҳимояланган компютер маълумотларига ноқонуний киришда айбланиб ҳибсга олинган.
Кислицин Қозоғистонда АҚШ ташаббуси билан Интерпол сўрови асосида ҳибсга олинган эди.
