Украина элчихонаси Ўзбекистон фуқароларини Россия Федерациясининг Украинага қарши урушида қатнашмасликка ва Украинанинг вақтинча босиб олинган ҳудудларига бормасликка чақиради.
Элчихона мурожаатида қайд этилишича, Украинанинг вақтинча босиб олинган ҳудудларида олиб борилган жанговар ҳаракатлар пайтида Россия босқинчи армиясининг катта йўқотишлари туфайли урушда қатнашиш учун хорижий фуқароларни жалб қилишга уринмоқда.
Украина Қуролли кучлари Бош штаби маълумотларига кўра, вақтинча ишғол қилинган Донецк вилояти Горловка шаҳрида жойлашган Россия босқинчи кучларининг бўлинмаларида Ўзбекистон фуқаролари борлиги аниқланган. Ушбу шахслар Украина давлат чегарасини ноқонуний кесиб ўтиб, қурилиш ишларини олиб бориш учун келган. Мариупол шаҳрига етиб келганидан сўнг, уларнинг паспортлари олиб қўйилган ва бу фуқаролар Россия ишғол кучлари сафига кўнгилли сифатида сафарбар қилинган.
Элчихона Ўзбекистон фуқароларини урушида иштирок этмасликка чақирмоқда. Украинага қарши қуролли тажовузда иштирок этган чет эл фуқаролари қонунчилик ва халқаро ҳуқуқ нормаларига мувофиқ жиноий жавобгарликка тортилади.
Шунингдек, қайд этилишича, Украинанинг вақтинча босиб олинган ҳудудларига, шу жумладан қурилиш ёки бошқа ишларда иштирок этиш учун ноқонуний равишда келган чет эл фуқаролари босқинчиларнинг шериклари деб ҳисобланади ва мамлакат қонунчилигига мувофиқ жавобгарликка тортилади.
