Ўзбекистон энергетика вазирлиги ва "Газпром" ўртасида газ соҳасида имзоланган ўзаро ҳамкорлик қилиш бўйича "Йўл харитаси" фаол жамоатчилик томонидан турли муҳокамаларга сабаб бўлди.
Муҳокамаларда ушбу ҳужжат билан “Газпром” Ўзбекистоннинг газ транспорти тизимини бошқарувга олса, унда мамлакатнинг энергетик мустақиллиги, умуман, давлат суверенитети хавф остида қолишидан ҳавотирлар мавжуд. Бу “йўл харитаси”дан мақсад нима, нималар бу келишувда назарда тутилган? Ва бу Ўзбекистоннинг манфаатларига қанчалик мос келади?, деган ўринли саволлар ўртага ташланмоқда. Ушбу саволларга барҳам бериш учун Энергетика вазирлигидан имзоланган шартнома шартларини очиқлаш талаб қилинмоқда.
Муҳокамаларга расмий жавоб берган Энергетика вазирлигига кўра, “Газпром” компанияси ўртасида имзоланган газ соҳасида ҳамкорлик бўйича “Йўл харитаси”нинг Ўзбекистон суверенитетига ҳеч қандай таҳдид йўқ.
"Музокараларда Россиядан Ўзбекистонга табиий газ етказиб беришнинг техник имкониятлари муҳокама қилинди.
Имзоланган “Йўл харита”га мувофиқ томонлар ўртасида тузилган Ишчи гуруҳ Қозоғистон ва Ўзбекистон ҳудудидан ўтувчи “Ўрта Осиё – Марказ” газ қувури орқали газ транзитини амалга ошириш учун зарур бўладиган техник чора-тадбирларни ва ўрганишни келишиб олинди.
Ишчи гуруҳ техник жиҳатдан барча ишларни якунлагандан сўнг, табиий газни етказиб бериш бўйича асосий шартларни муҳокама қилинади.
Шуни алоҳида таъкидаш лозимки, олиб борилган музокаралар ҳамда “Йўл харитаси”да Ўзбекистон Республикасининг мавжуд газ транспорти тизимига эгалик ҳуқуқини тўлиқ сақлаган ҳолда ички бозорга табиий газ зарур миқдорларда етказиб бериш мақсад қилинган. Бунда газ транспорт тизими кимгадир берилиши ёки суверенитетимизга қандайдир таҳдид умуман йўқ.
Келгусида ушбу йўналишдаги барча ишлар Ўзбекистон Республикасининг миллий манфаатларини тўлиқ ҳимоя қилган ҳолда амалга оширилиб, натижалари юзасидан доимий равишда жамоатчиликка маълум қилиб борилади", - дейилади баёнотда.
