Ижтимоий тармоқларда Бўзсув каналининг Зангиота тумани “Токзор” МФЙ ҳудудидан ўтган қисмига заҳарли канализация сувлари оқизилаётгани тўғрисида хабарлар пайдо бўлди.
Тошкент шаҳар Экология бошқармаси ҳолатга ойдинлик киритди.
Маълум қилинишича, ўрганиш жараёнига экологик мобил лаборатория ҳам жалб қилиниб, Бўзсув каналига ташланаётган оқова сувлардан, канал 500 метр тепа ва паст қисмларидан таҳлил учун намуналар олинди.
Ўрганишлар давомида сув қора рангда экани тўқимачилик корхоналарида ишлаб чиқариш жараёнида ҳосил бўладиган рангли оқова сувлар билан боғлиқлиги маълум бўлди.
“Бўзсув аэрация станцияси” технологик жараёнлари кўздан кечирилган ҳамда ушбу тозалаш иншоотига мунтазам равишда меъёрдан ортиқ ифлосланган моддалар ва рангли эритмалар ташлаб келаётган 7 та тўқимачилик ва 2 та қоғозни қайта ишловчи корхоналар рўйхати шакллантирилган.
Эндиликда ҳар бир корхона фаолиятини текшириш юзасидан бизнес-Омбудсманга буюртмалар киритилиб, белгиланган тартибда экологик назорат, ўрганиш ишлари олиб борилади.
