Самарқанд вилояти Булунғур туманида товламачилик билан шуғулланиб келаётган уюшган гуруҳ фаолиятига чек қўйилди.
Туман деҳқон бозори ёнида икки нафар фуқаро киракашлардан пул талаб қилиш билан шуғулланиб келган. Тегишли органлар томонидан уюштирилган тезкор тадбирда "солиқчи"лар киракашдан кунлик талаб қилинадиган 40 минг сўмни олган вақтда қўлга тушган.
Гувоҳлар иштирокида тинтув қилинганда, чўнтакларидан махсус ишлов берилган пуллар олинган. Маълум бўлишича, улар бу пулларни ўзларининг шахсий манфаатлари учун ишлатишган. Пул бермаган киракашларни баъзи ҳолларда калтаклаш билан жазолаш ҳолатлари ҳам бўлган.
Ҳозирда ҳолат бўйича тергов ҳаракатлари олиб борилмоқда.
