Шимолий Каролинанинг Чапел-Хилл Университети ва Даремнинг Дьюк Университети олимлари SARS-CoV-2 вирусининг кенг спектри ва унга яқин бўлган коронавируслар билан кураша оладиган антитаначани аниқлашди. Бу ҳақда "Vaksinauz" каналида маълум қилинди.
DH1047 антитаначаси вирус ҳужайралари билан бирикади ва, репликациянинг олдини олган ҳолда, уларни нейтраллаштиради. У инфекциянинг олдини олиш ва даволашда самара беради. Бу кашфиёт кўплаб дори ва вакциналар яратиш имконини туғдиради.
«Ушбу антитанача жорий эпидемияга қарши терапевтик восита бўлиб хизмат қилиши мумкин. У келажакда бошқа коронавируслар жониворлардан одамларга юқиб, янги эпидемиялар юзага келганда ҳам қўл келиши мумкин», — дейилади Duke Human Vaccine Institute директори ва тадқиқотнинг ҳаммуаллифи Бартон Хейнс баёнотида.⠀
DH1047 антитаначаси сичқонларда синовдан ўтказилди. У кемирувчиларни COVID-19 вируси билан контактдан кейин унинг ривожланишидан ҳимоя қила олиши аниқланди. Шунингдек, у барча штаммлар, жумладан, «Дельта» штаммига қарши курашда ҳам самарали эканлиги маълум бўлди.
«Қўлга киритилган маълумот коронавирусларга қарши турғун ҳамда ҳозирда маълум бўлган ва пайдо бўлаётган коронавирус турларидан ҳимояни таъминловчи универсал вакциналарни яратиш учун андоза бўлиб хизмат қилади», — деб таъкидлади доктор Ральф Барик, Шимолий Каролина Эпидемиология Университети профессори ва тадқиқотнинг ҳаммуаллифи.
