“Men 2012 yil 13 iyul kuni Toshkent shahrida doimiy propiska qilindim. Oradan uch yil muddat o`tdi. Hozirda poytaxtdan uy sotib olish istagidaman. Tegishli hujjatlarimni to`plab, uy oldi-sotdisini rasmiylashtirish uchun notarial idoraga murojaat qildim. Ular esa hozircha bu masalalar yopiq, deyishyapti. Bu qanchalik to`g`ri? Amaldagi qonun hujjatlariga ko`ra menga Toshkent shahridan uy sotib olishimga ruxsat beriladimi?”
A.Alibaev,
Toshkent shahri
Uchtepa tumani 12-mavze 5-uy.
2012 yil 16 fevralda O`zbekiston Respublikasi Vazirlar Mahkamasining “Toshkent shahri va Toshkent viloyatidan doimiy propiska qilish va turgan joyi bo`yicha hisobga olish tartibi to`g`risida”gi Qarori qabul qilingan. Aynan mana shu qaror bilan tasdiqlangan Nizomda fuqarolarniing Toshkent shahri va viloyatida doimiy propiska qilinishi talablari va shartlari ko`rsatib o`tilgan. Qaror kuchga kirganiga uch yil bo`lgan bo`lsa-da, bu borada ayrim tushunmovchiliklar ham yuzaga kelmoqda. So`zimizni yuqoridagi murojaat ham tasdiqlaydi. Fuqaro o`z murojaatida keltirib o`tgan holatlar yuzasidan O`zbekiston Respublikasi Ichki Ishlar Vazirligi Xorijga chiqish , kelish va fuqarolikni rasmiylashtirish boshqarmasiga yuzlandik.
B. Shorixsiev, boshqarma boshlig`i:
O`zbekiston Respublikasi Vazirlar Mahkamasining 2012 yil 16 fevraldagi 41-sonli Qarori bilan tasdiqlangan “O`zbekiston Respublikasi fuqarolarini Toshkent shahri va Toshkent viloyatida doimiy propiska qilish va turgan joyi bo`yicha hisobga olish tartibi to`g`risida”gi Nizomning 8-bandida, ro`yxatning 2,5,9,11- bandlariga muvofiq Toshkent shahrida doimiy propiska qilingan fuqarolar Toshkent shahrida va Toshkent viloyatida oldi-sotdi bitimlarini, almashtirish, renta, umrbod ta`minlash sharti bilan o`zgaga berish va hadya qilishni notarial tasdiqlash va davlat ro`yxatidan Toshkent shahri hududida kamida uch yil doimiy yashab turgan (lavozimda bo`lgan) jismoniy shaxs hisoblansa va ichki ishlar organining doimiy propiskasi borligi to`g`risidagi tegishli ma`lumotnomani taqdim etsa amalga oshirilishi belgilangan.
Bugungi kunda, ushbu ma`lumotnomani berilishi yuzasidan O`zbekiston Respublikasi Ichki ishlar vazirligi tomonidan normativ huquqiy hujjatlarga qo`shimchalar kiritilayotganligi sababli, ushbu masala o`z echimini topganidan so`ng, Siz tuman IIB pasport bo`limiga murojaat qilishingiz lozim bo`ladi.
