1 mayda etti kun davom etadigan 15 yillik yubiley konsertiga “start” bergan xonanda Shahzoda muxlislari qarshisiga chiqar ekan, “Sahnaga chiqishdan oldin juda qattiq hayajonlandim. Lekin siz aziz muxlislarimni ko`rib, hayajonim biroz tarqadi. Mehringiz uchun sizlardan minnatdorman! Bugun menga va ijodimga bo`lgan muhabbatingizni oqlashga harakat qilaman!” deya ichki kechinmalarini yashirmadi. Shahzoda hamma konsertda tomoshabin bilan xonanda o`rtasida turadigan baland sahnadan voz kechib, o`rtadagi “chegara”ni buzdi. 15 yillik ijodi davomida bitta-bitta ko`tarilgan “pillapoya”lariga muxlislar sabab erishganini unutmagan holda sahnani tomoshabin sari etaklovchi pillapoyali qilib qurdirgan bo`lsa ne ajab...
JAHONGIR POZILJONOV ChUChVARANI XOM SANABDI...
Noodatiy tarzda sahnada paydo bo`lgan Shahzoda gazetamizga bergan intervyusidagi va`dasiga sodiq qolgan holda kutilmagan duetlarni taqdim etdi. Xonanda Ulug`bek Rahmatullaev bilan kuylangan sho`x tarona barchani raqsga chorladi. Shohruxxon ishtirokidagi sokin duet sahna ko`rinishida to`la ochib berildi. Katta shippak tagiga yashirinib sahnaga chiqqan Jahongir Poziljonov Shahzoda bilan raqsda bellashdi. Shahzoda “Chuchvarani xom sanabsan...” deya duetdoshining “sevgi”sini rad etdi. Harakatlanuvchi sahnada “Formula1” mashinasiga o`tirgan holda “Bari gal” deya xonandani chorlagan Jasur G`oipovning chiqishi ham hech kimni befarq qoldirmadi.
GULChEHRA EShOQULOVA, ULUG`BEK QODIROV VA ShAHZODANING TRIOSI
1-blok yakunida sahnaning chap tarafidagi aylana sahnachadan Shahzodaning imijida paydo bo`lgan aktrisa Gulchehra Eshonqulova “Hayot ayt” qo`shig`ini kuylay boshladi. So`ng Shahzoda sahna markazidan joy olib, qo`shiqni davom ettirdi. Sahnaning o`ng tomonidagi aylana sahnachada esa aktyor Ulug`bek Qodirov “trio”ning davomida ijro etdi. Bu uchlik “Fotima va Zuhra” filmidagi qahramonlarni yodga soldi. “Trio” tomoshabinlar uchun chindan kutilmagan sovg`a bo`ldi.
SAROY TEPASIDAN ARQONDA TUShGAN MASHARABOZ
Konsertdagi eng quvnoq chiqishlar — “Qaynona” qo`shig`iga qiziqchi Halima Ibragimova va “Sabo” raqs ansambli qizlari bilan sahnalashtirilgan sahna ko`rinishi hamda “Chikko” ijro etilganda Davlat sirki masharabozlarining tomoshabinlar bilan muloqoti, “Chikita” qo`shig`iga “Tomosha” bolalar guruhining jajji o`g`il-qizlari chiqishi bo`ldi. Xuddi sirkdagidek tomoshabinlar tepasidan arqonda pastga tushgan masharaboz barchani lol qoldirdi.
“YoMONLAR HAM BITTA DARS!”
Konsertning 5ta bloki orasida 1983 yildan boshlab to bugungi kunga qadar Farg`onada tug`ilgan jiydakokil qiz Shahzodaning hayoti monolog tarzida videorolik bilan berib borildi. Mazkur iqrornoma orqali shu kuni muxlislar Shahzodaning dil tubidagi kechinmalaridan vofiq bo`lishdi. Xiyonat, aldov, dugonalarining bo`xtonlari, dushmanlar bari-barisi xususida to`xtaldi. Iqrorlarini muxtasar qilib, “Rahmat hayot” nomli qo`shiqni kuyladi.
Seni sevaman, seni sevaman hayot,
Neki so`radim bugun egaman hayot.
Men shunchali kuchlimas,
Yomonlar ham bitta dars.
Hammamiz oldingda qarz,
Rahmat hayot, dushman otgan tosh uchun
Har tomchi ko`zyosh uchun
Har tongi quyosh uchun, rahmat hayot!
FAKT:
- Konsertda jami 22ta qo`shiq ijro etildi, shundan 8tasi yangi.
- Shahzoda sahnada ? xil libosda namoyon bo`ldi.
- Konsert rejissyori ???
Bilasizmi?
- Shahzoda konsertning boshidan oxirigacha raqqosalar bilan baravar raqs tushdi. Hatto “Lazgi”da ham bellashdi.
- Sahna rekvizitlaridan unumli foydalanganini ta`kidlamay iloj yo`q. Shuning uchun ham har bir chiqish o`ziga xoslik kasb etdi.
Sadoqat ALLABERGANOVA tayyorladi.
Fotomuxbir: Islom RO`ZIEV
