Ozodbek Nazarbekovning “Ardog`imdasiz” nomli konsert dasturining ikkinchi kunida tahririyatimiz bilan mehmonda bo`lgan edik. Konsert kulminasiyasi bo`lgan “Aytib beraman” nomli qo`shiq barchaning ko`ziga yosh to`ldirib, olqishlarga sazovor bo`lganiga guvoh bo`ldik. O`sha kundan buyon ijtimoiy saytlarda “qo`shiq matni kimniki” deya qizg`in bahs ketmoqda. Tortishuvlar oxiri shunga borib etdiki, hattoki Nazarbekovning o`zi aynan shu mavzuga bag`ishlab 18 aprel kuni matbuot anjumani o`tkazdi.
Bahsga oydinlik kiritish maqsadida tomonlardan biri - Baxriddin Asror bilan bog`landik.
Baxriddin Asror: “Plagiat tamg`asini ko`tara olmayman”
Men bu mavzudagi she`rni bundan bir yil muqaddam ya`ni 2014 yil 5 fevral kuni yozganman. Shundan so`ng she`rimni Ravshan Jo`raev bir yil mobaynida tadbirlarda, bayramlarda aytib yurdi. Bu she`rni yozganimni barcha tanishlarimiz yaxshi bilardi. Nazarbekovning konserti boshlangach hamma menga sms yozib «tabriklaymiz she`ringizni Ozodbek qo`shiq qilib aytibdi, juda ajoyib, yurakni o`rtaguvchi qo`shiq chiqibdi” deb telefon qila boshlashdi. Ochig`i xursand bo`ldim, ammo bir ikki kun o`tgach, “u she`r seniki emas, Botir Ergashevniki ekan” deb mendan xafa bo`lishdi. Men hozir kimnidir plagiatlikda ayblamoqchi emasman ammo yaqinlarim, meni taniganlar meni ko`chirmachiga chiqarishlarini ko`tara olmayman.
Baxriddin Asror she`ri
Urush nima, o`q nima bilmagan edim
Hali besh yoshimgayam to`lmagan edim
Yangi o`yinchog`imga to`ymagan edim
Barchasini xudoga aytib beraman!
Vaxshiylik, qotillik barchasi gunoh!
Jabru zulming arshda bo`lgusi so`roq
Battol! Isyoningga millionta guvox
Barchasini xudoga aytib beraman!
Qanday bandasanu sen, qandayin ummat
Qo`ling qon, ko`zing qon, qarashing zulmat
Tangrimga etkazish xam farz, xam sunnat
Barchasini xudoga aytib berman!
Senlar iblismisan, yo shayton-la`na
Qon oqqan yurtida qilgan tantana
Yuz minglab mendaylar qilmasdan ta`na
Barchasini xudoga aytib beraman!
Do`xtirjon, mengamas onamga qarang
Otam, akam opam, o`rtog`imga ham
Jonin asrab qoling, xavotir olmang
Barchasini xudoga aytib beraman!
Vatanim tinch bo`lsa yashamasmidim
Ota onam bag`rida o`ynamasmidim
Besh yoshimga to`lmay olamdan o`tdim
Xammasi xudoga aytib beraman
O`zbekistondek tinch totuv yurt bor ekan
Bolalari faqat o`ynab kularkan
Tinchliksevar Yurtboshisi bor ekan
Bunisini jannatdek aytib beraman!
Yozuvchilar uyushmasi a`zosi Botir Ergashev bilan bog`langanimizda u mazkur masalaga quyidagicha fikr bildirdi.
Botir Ergashev: “Bunday bo`lishi mumkin emas”
Men ham ijtimoiy tarmoqlarda bu gaplarni eshitdim, to`g`risi e`tibor bermaslikka harakat qildim. Avvalo bu mavzu ya`ni notinch mamlakatda daydi o`qning qurboni bo`lgan bolaning jarrohlik stolida birdan o`ziga kelib “hammangizni xudoga aytib beraman”, deya jon berishi meni daxshatga soldi. Kechaning bir paytida ilxom quyulib bir o`tirishda ko`zlarimda yosh bilan bu she`rni yozdim. Endi plagiatlik mavzusiga qaytadigan bo`lsak bu erda hech kim plagiat emas. Bir mavzu haqida o`nlab yuzlab odam qalam tebratishi mumkin-ku.
BOTIR ERGAShEV she`ri
Nadomatki, yaratganga yolvorib
Deyolmasman murg`ak jonim qaytib ber
Ular seni o`ldirdi endi borib
Xammasini Alloximga aytib ber
Notinch yurtning peshonasi sho`r o`g`li
Dunyo axlin zor yig`latgan zo`r o`g`li
Endigina uch yosh eding go`ro`g`li
Xammasini Alloximga aytib ber
Har yurakka hayratlardan tug` ilib,
Nima ko`rding bu dunyoda tug`ulib
Yashamasin desang meni bo`g`ilib
Hammasini Allohimga aytib ber
Qancha qancha haddan oshgan boylar bor,
Burda nonga intiq holi voylar bor
G`arb atalmish gunohga g`arq joylar bor
Hammasini Allohimga aytib ber
Aytgin barcha shaytonga ulfatlarni
Yosh boshingga tushgan g`am-kulfatlarni
O`laksalar izlagan kalxatlarni
Xammasini Alloximga aytib ber
Donolar xor nodon o`rni to`r bo`ldi
Kimki g`o`rni ensa, o`sha zo`r bo`ldi
Uch yoshingda etgan joying go`r bo`ldi
Hammasini Allohimga aytib ber
Ezgulikni xo`p ezgusi borlar- G`arb,
Osiyoni osiylikka chorlar-G`arb.
G`arbdan chiqqan quyosh kabi porlar-G`arb,
Hammasini Allohimga aytib ber
Doktorlar mot, qismat degan "Farzinga"
Chora topmay ko`ksingdagi darzingga
Qo`shilaman hamma-hamma arzinga.
Hammasini Allohimga aytib ber
Faxsh otli kungil kuzi kurlarni,
Giyoxvandlik dardi yukkan g'urlarni,
Dinni nikob aylagan terrorlarni,
Xammasini Alloximga aytib ber!
Tug`ilsayding o`zbek degan millatda
Yashar eding minnati yo`q rag`batda
Xurginajon endi borib jannatda
Xammasini xammasini aytib ber
Bizningcha ijodda bunday hodisalar bo`lishi tabiiy, bir voqea yuzasidan bir qancha ijod namunalari yaratilganligi ham sir emas. biz xulosa chiqarishni muhlislarning o`ziga qoldirmoqchimiz.
