Innovasion rivojlanish vazirligi Britaniya Kengashining «Creative Spark» loyihasida hamkorlik qilmoqda, deb xabar berdi vazirlik axborot xizmati.
«Creative Spark» Buyuk Britaniya hamda Markaziy Osiyo (O`zbekiston, Qozo-g`iston, Qirg`iziston), Janubiy Kavkaz (Ozarbayjon, Armaniston, Gruziya) va Ukraina davlatlarining universitetlari, ta`lim muassasalari o`rtasida faol tadbirkorlik sohalarini rivojlantirish bo`yicha xalqaro aloqalarni rivojlantirishga qaratilgan besh yillik dastur bo`lib, talabalarda faol tadbirkorlik va tashabbuskorlik ko`nikmalarini shakllantirgan holda, jamiyatda kreativ iqtisodiyotni rivojlantirishga hissa qo`shishni asosiy maqsad qilib olgan.
«Kreativ iqtisod yurtimiz uchun yangilik bo`lgani bois bu ko`nikmalarni mahalliy oliy ta`lim muassasalari talabalari ichida keng targ`ib qilishda Innovasion rivojlanish vazirligi yaqindan ko`mak berish barobarida treninglar, o`quv va amaliy mashg`ulotlar, mahorat darslari o`tkazishda ko`mak beradi. O`quvchilar darslarda orqali faol tadbirkorlik faoliyatini yuritish uchun amaliy ko`nikmalarni qo`lga kiritib, kelgusida yurtimizning iqtisodiy ravnaqiga o`z hissalarini qo`shadilar», - deyiladi xabarda.
Loyiha davomida joriy yilning yanvar-mart oylarida «London Metropolitan University» xodimlari va hamkor tashkilotlar mutaxassislari tomonidan faol tadbirkorlik loyihalarini tayyorlash bo`yicha treninglar tashkil etiladi. Treninglarda faol qatnashgan talabalar o`z startap loyihalarini maxsus komissiyaga taqdim etadilar. Eng yaxshi loyihalar saralab olinib, loyiha mualliflari londonlik ekspertlar tomonidan tashkil etiladigan o`quv kursida qatnashadi va o`z loyihalarini yanada rivojlantirish imkoniyatiga ega bo`ladi.
Iyun oyida loyihalarning yakuniy saralash bosqichi o`tkaziladi va eng yaxshi loyiha egasi o`z loyihasini London shahrida investorlarga taqdim etadi. Safar xarajatlari Britaniya kengashining «Creative Spark» uchun maxsus ajratilgan fondi tomonidan qoplanadi. Shuningdek, faol ishtirokchilar Britaniya kengashi va hamkor tashkilotlar tomonidan rag`batlantiriladi.
Batafsil ma`lumotni ushbu havola orqali olish mumkin.
