Prezident Shavkat Mirziyoev Afrosiyob va Beshyog`och ko`chalari tutashgan joyda qurilayotgan ko`p tarmoqli sport saroyini borib ko`rdi. Bu haqda Prezident matbuot xizmati xabar berdi.
Bu erda qurilish ishlari 2017 yil fevral oyida boshlangan edi. Arena uch xil: muz, sport va konsert tartibida ishlaydigan bo`ladi. Zaruratga qarab, bir holatdan boshqasiga moslashtiriladi. Unda xokkey, figurali uchish, short-trek, kyorling bilan shug`ullanish, basketbol, voleybol, futzal, kurash, boks, qilichbozlik, taekvondo kabi sport turlari bo`yicha musobaqalar o`tkazish uchun zamonaviy sharoit yaratiladi. Shuningdek, bu erda konsertlar, ko`rgazma va konferensiyalar tashkil etish ham mumkin bo`ladi. Rejaga ko`ra, mazkur majmua joriy yil dekabr oyida, Yangi yil bayrami arafasida foydalanishga topshiriladi.
Davlatimiz rahbari majmua qurilishining borishi bilan tanishdi. Bu inshoot ulkan ijtimoiy ahamiyatga ega ekanini, butun yil davomida ishlashi zarurligini ta`kidladi. Bu erda shug`ullanadigan sport jamoalarini shakllantirish, ular uchun sport kiyimlari va anjomlarini ishlab chiqaradigan korxona tashkil etish bo`yicha topshiriqlar berdi.
