Andijon viloyati kasaba uyushmalari tashkilotlari birlashmasi raisi Q.Parpiev ishdan olingan. Bu haqda Kun.uz xabar berdi. Qayd qilinishicha, Qodir Parpiev Davlat soliq qo`mitasi sobiq raisi Botir Parpievning ukasi hisoblanadi.
Shuningdek, manba xabariga ko`ra, Andijon shahar ichki ishlar bo`limi boshlig`i, polkovnik Shuhrat Parpiev ham ishdan olingan. U Botir Parpievning jiyanidir.
Bundan tashqari, Buxoro viloyati IIB boshlig`i o`rinbosari, polkovnik Anvar Parpiev lavozimidan ozod qilingan. U Botir Parpievning ukasi Qodir Parpievning o`g`li hisoblanadi.
Manba bergan xabarga ko`ra, «Asaka» aksiyadorlik tijorat banki Andijon viloyat filialining boshqaruvchisi Zafar Parpiev ham ishdan ketgan. Uning ham Botir Parpievga qarindoshligi aytiladi.
Shuningdek, Tashqi ishlar vazirligi Konsullik huquqiy departamenti boshlig`i bo`lib ishlagan Dilshod Parpiev lavozimidan olingan. U Botir Parpievning o`g`lidir.
Botir Parpiev 1946 yilda Andijon viloyatida, milisiya general-mayori Rahmat Parpievning oilasida tug`ilgan. 1992-1996 yillarda Andijon viloyati IIB boshlig`i, 1996-1998 yillarda O`zbekiston IIV Yong`in xavfsizligi bosh boshqarmasi boshlig`i, 1998-2002 – O`zbekiston ichki ishlar vaziri o`rinbosari, 2002 yilning iyun oyidan dekabr oyigacha – O`zbekiston favqulodda vaziyatlar vaziri, 2002-2004 – O`zbekiston Davlat bojxona qo`mitasi raisi bo`lib ishlagan, 2003 yilda bojxona xizmati general-leytenanti unvonini olgan. 2004 yildan buyon Davlat soliq qo`mitasi raisi lavozimida ishlab kelgan.
Eslatib o`tamiz, B.Parpiev joriy yilning 11 may kuni Davlat soliq qo`mitasi raisligidan olingandi. U boshqa ishga o`tkazilgan. Ma`lum qilinishicha, endilikda B.Parpiev Fuqarolarning o`zini o`zi boshqarish organlari faoliyatini muvofiqlashtirish bo`yicha Respublika Kengashi raisining keksalar va faxriylar ishlari bo`yicha o`rinbosari sifatida ishlaydi.
Bundan tashqari, 19 may kuni Milliy olimpiya qo`mitasida O`zbekiston taekvondo WTF assosiasiyasining navbatdan tashqari saylov Konferensiyasi bo`lib o`tdi. Unda Botir Parpiev assosiasiya rahbarligidan ham ozod etilgandi.
