Vetnamning Xoshimin shahrida klublar o`rtasida Osiyo chempionati bahslari davom etmoqda. Musobaqaning “D” guruhida ishtirok etayotgan O`zbekistonning “Olmaliq” klubi ilk uchrashuvni Livanning “Bank Beyrut” jamoasiga qarshi o`tkazdi.
Gollarga boy kechgan bellashuvda livanliklar 8:3 hisobida g`alaba qozondi. “Olmaliq” safida Dilshod Irsaliev va Artur Yunusov gol urdi, yana bitta golni livanlik futzalchi o`z darvozasiga urib qo`ydi. Mag`lubiyatga qaramay, “Olmaliq”da pley-off bosqichiga chiqish uchun imkoniyat saqlanib qolindi.
“Bank Beyrut” dastlabki o`yinda “D” guruhi favoriti Tailandning “Chonburi Blyuveyv” futzalchilariga 0:9 hisobida imkoniyatni boy bergandi.
Ushbu guruhning so`nggi o`yinida “Chonburi Blyuveyv” va “Olmaliq” o`zaro bahs olib boradi. Bellashuv 25 iyul kuni o`tkaziladi.
Klublar o`rtasidagi OCh
Phu Tho Stadium, Xoshimin
23 iyul, yakshanba
“Olmaliq” (O`zbekiston) – “Bank Beyrut” (Livan) 3:8
Gollar: Dilshod Irsaliev (18, penalti), Artur Yunusov (22), avtogol (38)
Chetlatish: Dilshod Rahmatov (29)
