Ayrim OAVlar suv ombori aslida Qirg`izistonga tegishli bo`lgani haqida xabarlar e`lon qilishdi.
Qirg`iziston prezidenti Sadir Japarov O`zbekiston Kampirobod suv omboridan Farg`onaga ichimlik suvi etkazib berishni rejalashtirayotgani ortidan paydo bo`lgan turli xabarlarga munosabat bildirdi. U o`z tushuntirishlarini "Kabar" axborot agentligiga bergan intervyusida aytdi.
Qirg`iziston rahbarining aytishicha, ayrim ommaviy axborot vositalari Kampirobod suv ombori avvallari Qirg`izistonga tegishli bo`lgan, deb noto`g`ri yozishmoqda.
"Kampirobod qadimdan to`liq O`zbekiston tasarrufida. O`tgan yili chegara bilan birgalikda suv ombori masalasini hal qildik. Shartnomaga ko`ra, biz uni 50/50 boshqaramiz. Kampirobod suvining atigi 10 foizini Qirg`iziston foydalanadi. Qolganlari esa 100 yildan beri O`zbekistonga oqib ketadi", - dedi prezident.
Japarovning so`zlariga ko`ra, tomonlar suvning 900-gorizontal chiziqdan yuqoriga ko`tarilmasligi va qirg`iz erlarini suv bosmasligini ta`minlaydi.
"O`zbek tomoni shundoq ham O`zbekistonga oqayotgan suvni qay usulda olishining bizga farqi bormi? Quvur orqalimi, ariq yoki havodanmi – ahamiyati yo`q. Muhimi, har bir harakat o`zaro kelishuv asosida qilinadi. Bundan buyon qirg`iz–o`zbek do`stligi mustahkam bo`ladi", - degan Japarov.
Prezident shuningdek, ayrim ommaviy axborot vositalarining provokasiyalariga berilmaslikka chaqirdi.
