Namangan viloyati, Chust tumanida doridan zaharlangani taxmin qilinib, shifoxonaga yotqizilgan bolalarning barchasi sog`ayib, uyiga qaytdi. Bu haqda sog`liqni saqlash vaziri Amrillo Inoyatov ma`lum qildi, deya yozdi Kun.uz.
"Namanganda zaharlangani aytilgan bolalarning barchasi sog`ayib, bugungi kunda uyiga qaytarilgan. Hech bir bolaning ahvoli og`ir emas", degan vazir.
Inoyatovga ko`ra, Namanganda bolalarning ommaviy zaharlanishi bilan bog`liq holat to`liq o`rganib chiqilgan. Tez orada barcha savollarga javob beriladi.
Eslatib o`tamiz, 21 sentyabr kuni Namanganning Chust tumanida 70 nafardan ortiq bola ommaviy zaharlangani xabari tarqaldi. Shundan so`ng, 22 sentyabda Andijonda, undan bir kun o`tib esa Toshkentda ham bolalar ommmaviy shifoxonaga tushayotgani aytildi. Sog`liqni saqlash vaziri o`rinbosari Chustdagi bolalar dori yoki ovqatdan zaharlanmaganini ta`kidladi. Bosh prokuratura tomonidan Namanganda bolalar zaharlanganligi holati yuzasidan jinoyat ishi qo`zg`atildi. Ayni paytda Antistrumin dorisini sog`liq uchun xavsizligi to`liq ta`minlangunga qadar barcha maktab va bog`chalarga tarqatish va iste`moli to`xtatilgan.
