Kecha, 25 sentyabr kuni ijtimoiy tarmoqlarda avtobus haydovchisi va avtobus yo`lovchilari o`zaro tortishayotgani aks etgan video tarqaldi.
Mazkur holat yuzasidan "Toshshahartransxizmat" AJ Axborot xizmati rasmiy ma`lumot berdi.
Unga ko`ra, ushbu holat avtobus saloniga o`rnatilgan videokuzatuv vositalarida qayd etilgan holatlar asosida o`rganib chiqilgan.
O`rganish jarayonida 93-sonli avtobus yo`nalishi haydovchisi A.G`. boshqaruvida Yunusobod 9-dahasidan "Food city" savdo markazi tomon harakatlanib ketayotgan "King Long" rusumli avtobus salonidagi yo`lovchi avtobusni to`xtatishni so`ragan. Haydovchi belgilanmagan joyda avtobusni to`xtatmasligi to`g`risida yo`lovchiga ma`lumot bergan.
Shunga qaramay, yo`lovchi tomonidan haydovchiga haqoratli so`zlar gapirilib, avtobusni boshqaruviga xalaqit berilganligi aniqlangan. Qolaversa, tortishuv natijasida yo`lovchi va unga hamrohlik qilayotgan ayol yo`lovchi avtobusdan tushib, uning old tomoniga turib olib, 15 daqiqa davomida harakatlanishiga to`sqinlik qilgani ma`lum bo`lgan.
Hozirda voqea yuzasidan qo`shimcha o`rganish ishlari olib borilmoqda.
