Joriy yil 22 sentyabr kuni Belgiyaning Bryugge shahridagi Evropa kollejida Markaziy Osiyo davlatlari elchilari Evropaning etakchi diplomatiya akademiyasi rektori, Evropa Ittifoqining 2014-2019 yillardagi tashqi ishlar va xavfsizlik siyosati bo`yicha sobiq oliy vakili Federika Mogerini hamda Diplomatiya akademiyasi tinglovchilari bilan uchrashdi. Bu haqda “Dunyo” axborot agentligi xabar berdi.
Uchrashuvda Federika Mogerini kelgusi yili O`zbekistonda birinchi Markaziy Osiyo–Evropa Ittifoqi sammiti bo`lib o`tishi kutilayotganini ma`lum qilgan.
“Ikki tomonlama aloqalar tobora kengayib bormoqda, davlat rahbarlarining ko`p tomonlama uchrashuvlari bo`lib o`tmoqda, kelgusi yili O`zbekistonda birinchi Markaziy Osiyo–Evropa Ittifoqi sammiti bo`lib o`tishi kutilmoqda. Markaziy Osiyo mamlakatlari va Evropa Ittifoqi savdo va iqtisodiyot, barqaror rivojlanish, xavfsizlik va atrof-muhit, islohotlarni amalga oshirish, inson huquqlari va yaxshi boshqaruvni mustahkamlash, shuningdek, mintaqaviy hamkorlik va o`zaro bog`liqlik sohalarida bir-birlari uchun qimmatli sheriklardir”, degan u.
Evropa komissiyasi 2024 yil boshida Bryusselda bo`lib o`tadigan investisiya forumiga hozirlik ko`rayotgani va barqaror transport kommunikasiyalarini, xususan, Markaziy Osiyoni Evropa bilan bog`laydigan va mintaqa mamlakatlariga tashqi bozorlarga qo`shimcha kirish imkonini beruvchi Trans-Kaspiy yo`lagini rivojlantirish uchun moliyalashtirishga e`tibor qaratilishi, shuningdek, Markaziy Osiyo va Evropa Ittifoqi mamlakatlari hamkorlikning eng yuqori darajasiga ko`tarilgani qayd etilgan.
