Davlat rahbari tashabbusi bilan boshlangan yangilanish va qayta ta`mirlash ishlari Buxoro viloyati Kogon tumani “Sorg`un” mahalla fuqarolar yig`inida ham davom etmoqda. Xayrli tashabbus va sa`y-harakat tizimli ravishda ishlab chiqilgan “Obod xonadon – obod ko`cha – obod mahalla” dasturi doirasida jadallashtirilmoqda.
Dasturga muvofiq “Sorg`un” va “Xo`ja Yakshaba” mahalla fuqarolar yig`inlarida amalga oshirilgan keng ko`lamli obodonlashtirish va qayta qurish ishlari uchun qariyb 33 milliard so`m mablag` hisobiga yo`l-transport, muhandislik–kommunikasiya tarmoqlari, ijtimoiy soha inshootlari, boshqa bozor infratuzilma ob`ektlarini barpo etish va mukammal ta`mirlash ishlari olib borilmoqda.
– Ma`muriy jihatdan Katta Org`un, Oynasoz, Oq oltin, Parakti, Sorg`un, Surxiyon, Sug`diyona, Asalxo`ja kabi 8 ta qishloqdan tarkib topgan mahallamizda bugunga kelib 714 ta xonadon, 819 ta oila va ularda istiqomat qilayotgan aholi soni 3570 nafarga etgan, – deydi “Sorg`un” mahalla fuqarolar yig`ini raisi Baxtiyor Bekmurodov. –Hududda 500 dan oshiq pensioner, nafaqaxo`r bo`lsa, aholining mehnatga layoqatli qatlami 1870 nafardan ziyod. Shulardan hozirda muqim ish o`rniga ega bo`lgani 1757 nafarni tashkil etmoqda. Ishsiz esa rasman 63 nafar bo`lib, jismoniy imkoniyati cheklangan fuqaro soni 54 nafar, yana ijtimoiy muhofazaga olingan nochor oila soni o`nga yaqin. Qolaversa, bizda boquvchisini yo`qotgan va yakka-yolg`iz, qiyin sharoitda yashayotgan o`ndan ortiq oilaga mehr-muruvvat ko`rsatilmoqda. Alohida toifalanganlarga kelsak, 1 ta oila “Temir daftar”ga kiritilgani holda 23 nafar yigit-qiz “Yoshlar daftari”dan, 102 nafar fuqaro esa “Ayollar daftari”dan o`rin olgan.
Hududdagi obodonlashtirish va yangilanishni avvalo hudud muhandislik-kommunikasiya tarmog`ining takomillashtirilayotgani, bundagi ijtimoiy inshootlar qiyofasi zamonaviy ko`rinishidan yaqqol bilish mumkin. Jumladan, o`z bag`riga jami 560 nafar o`g`il-qizni olgan 7- va 23-sonli umumta`lim maktablari keyingi yillarda butunlay yangidan ta`mirlangan, qo`shimcha qurilishlar bajarilgan.
Investisiya dasturi asosida roppa-rosa bir yil oldin pudratchi korxona “Galaosiyo Soxtimon” MChJ tomonidan bunyod qilingan 240 o`rinli zamonaviy ta`lim dargohi binosi va standart talabiga ko`ra 12x18 metr o`lchamdagi sport zali qurilishiga qariyb 4 milliard mablag` sarflangan. Maktabda issiqlik tarmog`i bilan birga barcha sinf xonalari, fan kabinetlari, o`qituvchilar xonasi risoladagidek hozirlangan. Bir yil oldin hududda tibbiyot maskani bo`lmagan, bugun esa sorg`unliklar kuniga 60 qatnovga mo`ljallangan oilaviy shifoxona punktiga ega bo`ldi.
Mahallada foydalanishga topshirilganiga 3 yil to`layotgan 10-sonli davlat maktabgacha ta`lim tashkiloti hozir 125 nafar jajji bolani o`z bag`riga olgan. Bu shinam muassasa pudratchi “Shavkat Mo`min” MChJ jamoasi tomonidan umumiy qiymati 2 milliard 951 million so`m mablag` evaziga barpo qilindi.
E`tiborlisi, unda ishlashga qabul qilingan 31 nafar mutaxassis va ishchi-xodim mahalliy aholi orasidan uyda o`tirib qolgan ishsizlar, ijtimoiy muhofazaga muhtoj xotin-qizlar orasidan tanlangan.
Hudud infratuzilmasida ro`y berayotgan o`zgarish va yangiliklar ham oz emas. Chunonchi, shu yilning o`tgan oylarida Sorg`un mahallasidan o`tuvchi “4K-182” Kogon-Katta Org`un-Yanglov-Qiziltepa yo`lining 3 kilometr qismi tuman yo`llardan foydalanish unitar korxonasi tomonidan asfaltlashtirilgan bo`lsa, tashkilot tomonidan yo`l chekka qismlarida aholi qatnovi uchun 2 kilometr masofada piyodalar yo`lakchasi barpo etilgan. Bu loyihaga davlat byudjeti hisobidan 2 milliard so`mga yaqin mablag` sarflangan.
Shuningdek, Oynasoz, Sorg`un, Parakti, Surxiyon qishloqlari bo`ylab o`tgan ichki yo`llardan qish yog`ingarchiliklarida o`tib bo`lmas darajaga etgan 1450 metr qismi shag`allashtirilgan bo`lib, shundan 1240 metr qismiga asfalt bostirilgan. Yana qishda loy, yoz jaziramasida changi osmonga o`rlaydigan ko`chalarning 2500 metr qismi esa betonlashtirilgani shu erlik aholini xursand qildi.
– Boshqa hududda bo`lgani kabi sorg`unliklar ham elektr energiyasi ta`minotidagi uzilishlardan chetda qolmagan, – deydi tuman elektr tarmoqlari idorasi mutaxassisi Elmurod Hamroev. – Hududda 5,7 kilometr masofadagi elektr liniyasi butunlay yangilandi. Yangi rusumdagi “SIB” kabeli tortildi. Eskirgan simyog`ochlar o`rniga 130 ta temir-beton ustun o`rnatildi. Katta Org`un qishlog`ida 100 kilovatt soat quvvatga ega transformator o`rniga yangi 250 kilovatt soat quvvatga ega elektr transformator o`rnatilgan. Mavjud transformatorlarning 3 tasi ta`mirdan chiqarilgan.
Sorg`un tabiiy gaz etib bormaydigan hududlardan biri. Shuning uchun bunda ham aholi kundalik ehtiyoji uchun “Kogongaz” ta`minot bo`limi tomonidan hududdagi iste`molchilar, 734 ta xonadonga suyultirilgan gaz yonilg`isi maishiy ballonlarda uzluksiz etkazib berilmoqda. So`nggi oylarda tumanda o`tayotgan mutasaddilar, sektor rahbarlari sayyor qabullarida suyultirilgan gaz balloni etishmovchiligi bo`lgan o`ttizga yaqin xonadonga maishiy ballon etkazilgan.
Mahalla aholisini tashvishga solayotgan muammolardan biri bu toza ichimlik suvi ta`minotidir. O`tgan yili yoz oylarida birgina Surxiyon qishlog`ida 11 ming metrdan ortiq uzunlikda vodoprovod tarmog`i o`rnatilgani tufayli 125 ta xonadon iste`molga yaroqli toza ichimlik suvidan bahramand bo`lmoqda. Shundan so`ng hududga yaqin “Kurjan” suv uzatish inshooti bultur “Obod qishloq” dasturiga muvofiq qayta rekonstruksiya qilindi. Bu loyiha va qishloqdagi tarmoq qurilishi uchun 600 million so`mdan oshiq sarmoya o`zlashtirilgan. Endilikda boshqa qishloqlarni ham vodoprovodlashtirish chora-tadbirlari ko`rilayotir.
Umuman, obodlik va yangilanishlarni nafaqat hudud qiyofasida, balki har bir oilada turmush tarzi yaxshilanayotgani misolida ham ko`rish mumkin.
Shu nuqtai nazardan, ayni kunda ijtimoiy muhofazaga muhtoj aholi qatlami bilan ishlash, ular tashvish va muammolarini echishga e`tibor kuchaytirilgan.
Tuman hokimininng “Sorg`un” mahalla fuqarolar yig`inidagi yordamchisi Islom Istamovning aytishicha, joriy yilda “Har bir oila–tadbirkor” dasturi asosida ehtiyojmand fuqarolar, yosh tashabbuskorlarga “Xalq banki” qo`llab-quvvatlovida uch yil muddatga, past foizda qaytarish sharti bilan har biri 33 million so`mgacha miqdorda rasmiylashtirilayotgan sarmoyalar o`nlab oilalarni sog`lomlashtirish, iqtisodiy oyoqqa qo`yish, ularga ishlab daromad orttirish imkonini bermoqda.
